Potopoto suli o Tiumalu Alatasi o Satapuala

Reunion Suli o Tiumalu Alatasi Satapuala
Reunion Suli o Tiumalu Alatasi Satapuala

Ole taeao ole Aso Lulu ole vaiaso ua mavae 22 o Mati na tatala aloaia ai le faamoemoe poo le Reunion o suli o Tiumalu Alatasi mai le afioaga o Satapuala oloo alala ma aumau i atunuu eseese ole kelope ile hall ale Ngati Otara, i Otara.

O lenei faatasiga sa auai alo ma fanau mai Amerika, Hawaii, Ausetalia, Samoa ma Niu Sila. E toaiva i latou sa tupuga mai ia Tiumalu Alatasi, ma ua maliliu le toafitu ae oloo soifua mai le toalua le tina matua ia Nise oloo aumau i Samoa faapea le tamā ia Tolumaanave Eti Fono Tiumalu oloo aumau i Ueligitone.

Ole toatele o fanau oloo faataunuuina lenei faamoemoe ole augatupulaga lea ale lua ma le tolu seia faasolo ifo i lalo i fanau laiti, ae oloo taulamua ai le afioga ile faipule ia Aupito Su‘a William Sio.

Ole naunautaiga ole afioga ile faipule ia toe taumafai e tatai lagona ma mafaufau o fanau a latou mātua faapea a latou fanau ina ia latou iloa lo latou tupuaga ma lo latou faasinomaga e pei ona soifua mai ai o latou tuaa ua fai i lagi le folauga, ae le gata i lea ia taumafai e faamasani fanau lalovaoa ina ia maua ei latou le nofo fealofani ma le mafuta faatasi ma ia maua le agaga ole osi aiga.

Ole toatele ole aiga o fanau oloo aumau i atunuu i fafo ae ose tasi lea o anavatau oloo taumafai e momoli ma aoao ai fanau ole iloa ole tu male aganuu faasamoa moni aemaise ole faiga o feau faasamoa.

Ole Aso Lulu sa tatala ai loa le mafutaga ile powhiri a Maori, sosoo ai ma le ‘ava ole feiloaiga lea na saunia e alo ma fanau ole aiga oloo aumau i Niu Sila, ma faafeiloai ai ele faipule le aiga potopoto i lana saunoaga.

Ole Aso Tofi na alu ai le matamataga a fanau ile Museum poo le Fale Mataaga e maimoa ai ile faaaliga o measina ale Pasefika aemaise lava ia Samoa ina ia latou iloa ai measina ale atunuu auā e moni lava o fanau Samoa ae o fanau sa fananau i atunuu i fafo e le tele so latou iloa poo se malamalamaga i measina ale atunuu.

Na faasolo ane ile fanuatanu i Manukau e asia le fanua ole tina ia Taemanu, ole toalua lea o Tiumalu Alatasi faapea nisi o tagata ole aiga oloo lagomau ai, auā ua tele ina maliliu tagata ole aiga ma tanu i Samoa nisi, o Niu Sila nisi ae faapea foi i Ausetalia ma Amerika. Na faaiu polokalame ole aso ile po lava lea ile talanoaina ole talafaasolopito ole aiga ile fesootaiga o gafa. Ole Aso Faraile na avea lea ma aso taalo mo le aiga atoa ina ia mafai ona faamasani ai pea tamaiti, ae ole Aso Toonai na alu ai le maimoaga ile Pasifika Festival ma faaiu ai i polokalame ole po ile latou po siva.

Ole taeao ole Aso Sa sa tapunia ai loa polokalame ole Reunion ile sauniga lotu ma faaiu ai ile saunoaga ale afioga ile faipule ia Aupito Su‘a William Sio, lea sa ia toe faamanatu ai i tupulaga ma fanau ole aiga le galuega sa fai e mātua o mātua ua taooto mai i tiasa ile latou saili malo mo aiga lea ua tele ina maua ai lea manuia ua manuia ai le lautele ole aiga.

Sa faapea foi ona talanoaina i lea mafutaga nisi o vaega tāua ole Reunion e pei ole sailiiliga o auala e ono faamaopoopo ai aiga, ia faamalamalama atili pea le gafa ole aiga, ia taumafai ia faaauau pea mafutaga faaleaiga faapenei, ae ole ā foi sona tāua ile aiga ma fanau faatasi ai ma le talanoaina oni matai mo suli o Tiumalu Alatasi i Satapuala.

E ui e na ole toafa suli o Tiumalu Alatasi sa auai ae sa iai le talitonuga ole afioga ile faipule, sa matagofie mea uma ile galulue faatasi ole fanau ma aiga.

Ose aiga ua tupu ma lauolaola le tele o fanau ae ua tāua lea faamoemoe ua maitauina ai le tele atu o aa ole tagata nai lo aa ole laau. Ma ua toe tasi moemoe ai nei le finagalo ole aiga potopoto, ole 2020 ole a toe tuufaatasia ai se isi mafutaga poo le Reunion i Samoa, ina ia mafai ona faaauauina pea le mafutaga fealofani i totonu ole aiga.

Ole lona lua ai lea o mafutaga ale aiga talu ona faaauauina le reunion, lea sa amata i Hawaii ile tausaga 2014, ona see mai lea i Niu Sila nei ile 2017 ae ole 2020 ole a faia i Samoa pe a aulia ile alofa ma le faatasi mai ole Tapaau sili oi le lagi.