Potopoto Ekalesia AOG, Emanuelu, Worship e valaau

Na potopoto ma faatumulia le sauniga tuufaatasi a ekalesia e sefuluvalu i Sini i le Aso Sa talu ai mo le sauniga e valaau ai mo fanau ma talavou ina ia tulai ma faaaogā a latou taleni ma agavaa mo galuega a le Aua.

O le ekalesia Samaria Agalelei i Ballantry Drive i St. Andrews o loo galulue ai Ps Mika Mataia ma le faletua ia Victoria Mataia na faataunuuina ai lenei sauniga. O le susuga ia Ps Ausitini Fomai o le Ekalesia Emanuelu mai Claymore mai le afioaga o Asau, na feagai ma le tatalo amata ae o Ps Mika Mataia na folafolaina le lauga autu.

Na vaaia foi le felanulanuai o togiga ma viiga faaleagaga mai Autalavou e sefuluvalu na auai faapea le manino o le feau mo le alii i siva faalelotu na saunia.

O le autu o le lauga a Ps. Mika aemaise mo le fanau ma talavou ‘Ia faaaogā nei loa taleni o i totonu o aulotu mo galuega eseese a le Alii e pei o le aufaipese ma le autalavou, piano mo viiga i sauniga, kitara mo fatuga mālie o le lotu ma ia filifili le finagalo o le alii mai ‘ai o le matagi o lenei soifuaga.

O se tasi foi o Ekalesia na auai o le Samoa Universal Church i Liverpool o loo galue ai Ps Afa Fili faapea ma le Worship Centre. O se tasi o vaaiga ma leo na faalogoina o le matagofie o le momoliina i le gagana Samoa o le upu fetalai aemaise fanauiti seia oo lava i talavou.

Na faailoa e Ps Mika Mataia e faalua i masina taitasi ona faia sauniga faaleaoga i fanau e tautatala ma folafola ai upu o le Tusi Paia i le gagana Samoa.

O le susuga i le Faifeau ia Ps Mika na soifua mai lava i Samoa i afioaga o Faleaseela i Lefaga ma ona aiga i Vaiusu ma Sapapalii ae o le faletua ia Victoria o le lupe faalele mai Toamua i Faleata ma Tiavea a ua galulue nei i St Andrews.

E lē gata o le faamalosi ma faatāua i fanau ma le isi tupulaga le tāua o le gagana ma le aganuu Samoa e faapupula foi i le fanau o le “Faasamoa e totō ai le Alofa e lē pei o isi gagana.”

Saunoa Ps Mika e le gata i le faitau o le Tusi Paia i le faasamoa ae o pese foi ma viiga e aogā e malosi ai Aoga Aso Sa, autalavou ma faaolaola ai lava le agaga ma le malamalama i mea faasamoa pe matutua fanau.

Na iloga lea mau i le matagofie o viiga ma le naunautai o le aofia ia maualuga le faaneenee i le Aso Sa. O le vaiaso nei e faatuina ai se isi a latou ekalesia i le aai o Liverpool.