Ole tagata ma lona tupuaga, ole tagata ma lona faasinomaga, ole tagata foi ma lona siosiomaga. Pe folau lava lou sa i atunuu ese ma aumau ai, ae ole Isaraelu moni lava ia e toe susue lona faamalama ma toe tilotilo i lona tupuaga na fofoa mai ai lona olaga.
Ole agaga lea na tupu i loto o tamafanau ale afioaga o Vailima ma Vaoala i Aukilani ina ua tāpā ele afioaga i Samoa se fesoasoani o ana tamafanau i Aukilani e ala ise seleni e fesoasoani ile fausiaina ole faleaoga auā aoga ale fanau.
Ole taeao ole Aso Toonai na molimauina ai se nuu maopoopo ma ua avea ose aiga e tasi ina ua auai uma tamafanau o lea afioaga ma a latou togiga matagofie ile fale faafiafia ole Tausala i Magele e galulue faatasi e tuufaatasia se seleni auā le tali atu ile talosaga ale komiti ale aoga mose fesoasoani.
Na tatala le polokalame ile sauniga lotu na taitaia ese tasi o lupe faalele ole afioaga le susuga ia Rev Pe‘a Poe male faletua ia Sieni, ona saunoa lea o le fofoga o le aso le susuga ia Levaa Naoupu Niu Lesa e faafeiloai le paia male mamalu ole auvalaaulia.
O ipu a aiga ole mafutaga na tatala ai le faamoemoe i lea aso faatasi ai ma ipu alofa a aiga ma uo sa agai atu ma opogi le faamoemoe ale mafutaga. Ole laufofoga fiafia male galulue faatasi o tagata ole mafutaga na tupu a‘e ai le loto fuatiaifo ile fia foai mole manuia ole fanau lalovaoa ole nuu i Samoa.
E $24,000.00 le aao mafola male alofa tulai ole mafutaga faapea le auvalaaulia na taulimaina ele mafutaga ile Aso Toonai.
Ole susuga ia Levaa Naoupu Niu Lesa sa fai ma fofoga ole mafutaga i Vailima ma Vaoala e momoli le agaga faafetai ile mamalu ole auvalaaulia faapea aiga e tusa ai male lagolagoina o lenei faamoemoe ma alo ai loa ile taumafataga.
Ile saunoaga ale susuga i Le Papaliitele Puaasegisegi Lafulafu Peo, ole teutupe lea ole mafutaga i Niu Sila, na ia ta‘ua ai, sa ave le talosaga ale latou nuu ile JICA mo se fesoasoani ile fausiaina ole faleoaga, ae na tāpā mai ele JICA ile komiti se tupe e totogi muamua (deposit) e $100,000.00 ona faatino ai lea ole faamoemoe.
Ona saili tupe lea ole afioaga i Samoa mo lenei seleni, ona maua ai lea ole $30,000.00, ona tapa mai lea ose fesoasoani a alo ma tamafanau ole afioaga oloo i Aukilani e manaomia se $70,000.00 auā le faalavaina ole tupe e pei ona manaomia mai ele JICA.
Faailoa e Le Papaliitele Puaasegisegi Lafulafu Peo, sa iai nisi a latou sailiga seleni sa fai muamua, ae sa fai lava ma faaputuputu seia oo lava ina oo mai ile latou faamoemoe mulimuli lenei, ma tuufaatasia ai loa le seleni atoa ma maua ai le $41,000.00.
Ma a faaliliu lenei tupe ile seleni Samoa ona maua ai lea ose vaega tupe e silia male $70,000.00, ma o lenei seleni uma ole a malaga aloaia atu ai nisi ole mafutaga i Samoa e tuu aloaia atu lea ile pulega a alii ma faipule auā le faamoemoe mo se faleaoga.
Ole komiti ole mafutaga a Vailima ma Vaoala i Aukilani sa latou faafoeina lenei faamoemoe, ole Taitaifono ole susuga ia Muliaumasealii Tuimalavasii Fou Tagiilima, ole Failautusi o Niuafolau Tuamafa Taloto, male Teutupe ole susuga i Le Papaliitele Puaasegisegi Lafulafu Peo.
Ole agaga faafetai ale mafutaga a Vailima ma Vaoala i nisi o ana tamafanau le susuga ile faafeagaiga ia Lui Ponifasio male faletua ia Ane ile lagolago atu ile faamoemoe faatasi ai ma tamafanau ale afioaga oloo alaala ma papaaao i Aukilani.
