E lei mamao atu nei ona faaulufale le maota ole fesoasoani ole Ekalesia Katoliko i Faala i Palauli, ae o lea ua toe amata le isi galuega fou ole fausiaina lea ole maota ole aulotu.
O nei galuega uma e lē o tuua ai le galulue malosi o alo ma tama fanau o lea afioaga i totonu o Aukilani e saili seleni auā lava so latou sao e tuuina atu ile fausiaina o lea galuega.
Ole aoauli ole Aso Toonai na pepese fiafia ai le mafutaga a Faala Palauli ile hall ale Ekalesia Katoliko i Mount Wellington, e tuufaatasi se seleni auā le faamoemoe i Samoa.
Ua faailoa le alofa moni o aiga ole mafutaga faapea uo ma ē masani e ala ia latou saasaaga sa fai.
Ole tina matua ia Selau Aisea na ia tatalaina faafiafiaga ona faagasolo loa lea o ipu o aiga ole mafutaga faapea uo ma ē masani sa alolofa atu. Ole susuga ia Tapusoa Pesamino sa fai ma fofoga ole aso ae ole afioga ia Patele Wieslaw na ia taitaiina le polokalame ile tatalo.
O Faala ose tasi lea pitonuu ole itumalo o Palauli ae e iai foi nisi o ekalesia oloo iai totonu, ae ua avea le faamoemoe ole Ekaleisa Katoliko ma avanoa ua toe feiloai ai tagata o lea afioaga o loo lolotu i nisi ekalesia e lagolago faatasi le sailiga seleni ale Ekalesia Katoliko.
Ole agaga fiafia ole susuga ile taitaifono ifa Taua Falaniko o ia sa taualugaina le po siva i lea aso, o le taua ia te ia o lenei faaoemoe ua mafai ona toe feiloai ai tagata o le nuu, aua e eseese lava nofoaga o loo aumau ai i Aukilani ae se’ase’a foi maua se mafutaga faapenei.
E $10,000 le aao foai ale mamalu ole auvalaaulia faapea le mafutaga sa tauaaoina, ma o lenei seleni ua tuuina sao atu loa i Samoa aua le faatinoina o le galuega e pei ona faatalauula mai ai le ekalesia Katoliko. Saunoa foi le taitai fono ia Taua Falaniko, e iai nisi a latou sailiga tupe sa taumafai e saili ai se isi seleni auā lava lenei galuega e pei ole latou ponesi sa faasavali mai ile lua masina ina ua faavae le mafutaga, seia oo lava ina fatino le posiva lenei auā lava le maota ole aulotu.
Oloo iai lava le tupe ale aulotu i Samoa e fausia ai ma amata ai le galuega, ae ole faatalauula mai lava ole aulotu mo se fesoasoani a tamafanau i Aukilani poo le ā lava se seleni e tauaaoina e talia lava ma le agaga fiafia, ma ole Isaraelu moni lava ia e susue lona faamalama ma toe vaavaai i lona tupuaga ma lona siosiomaga.
