‘E tāua faitioga pe a leai se faale-tagata’,…Tanupo Aukuso

O loo talia e le pulega o le South Pacific Pictures na pueina le ata tifaga Samoa o le Tautoga Gausia faitioga ua faalele ma ta‘ua ai sa lē tatau ona iai se vaega o le ata e fesootai ma le pule i le ola.

Peitai e manatu le alii pule le susuga Fiu Tanupo Aukuso, e tāua faitioga pe a iai ni faavae, ae lē o ni faitioga e faale-tagata (personal).

Faaalia e le alii pule e lē o faamuamua ma faatāua i le ata le pule i le ola o le alii na autū i ai le tala o Sam, ae o le aano o le tala o loo momoli mai i le faigauo ma le va o aiga e lua na feteenai ona o le eseese o tapuaiga tau lotu, ma le tauave e le aiga lava ia o lana lava tapuaiga e faia ai le faaipoipoga o loo momoli mai ai se a‘oa‘oga tāua.

O se ata tifaga muamua ua pueina i le gagana Samoa ma faaaogā i ai tagata Samoa. Sa maimoaina muamua e le taitai o le Malo ma nisi o le kapeneta faapea ai ma le fofoga fetalai o le Palemene.

Na mae‘a foi ona silasila iai le pasi ata a le Malo ma faia ai le faaiuga e faaali atoa le ata, ona e leai se vaaiga o afaina ai tulafono o loo puipuia ai ata tifaga e faaulufale i Samoa.

Peitai o le faalapotopotoga o le Faataua le Ola, ua faaleo so latou lagona faanoanoa ona i le latou silasila, ua aumai ai se ata o le pule i le ola, e fai ma faatupu manatu i tupulaga ma iu ina mulimuli ai ma faapea o le fofo lea o se faafitauli e aafia ai se faiga-uo.

E iai nisi o ata tifaga sa pueina i Amerika sa faaalia i Samoa ma maimoaina foi i ata mai fale video o loo iai vaaiga o le pule i le ola i le tala o loo momoli mai e ia ata tifaga, ma e manatu le susuga Fiu Tanupo Aukuso, e leo agai iai ni manatu faitio pe faasea foi iai le faalapotopotoga o le Faataua le Ola.

Ua manatu le faletua o Aruna Curry le faatonu o le Faatua le Ola, ona o le ata ua faaaoga ai le gagana Samoa, ma o vaaiga foi i le tala atoa o loo momoli mai i le siosiomaga o loo ola ma soifua ai le atunuu, o le faavae lea o le latou tete’e.

I se finagalo o le Pule Sili o le Matagaluega o Faamasinoga ma Mataupu tau faamasinoga o loo iai le pulea o le pasiaina o ata tifaga, ua faaalia ai e le tofa Masinalupe Tusipa lona lagolagoina o le faaiuga a le Komiti e pasia ata e pei ona faamauina le talafeagai o le ata mo tagata uma e maimoaina.

Faaalia e le Pule Sili o le mae‘a siakiina o le Tautoga Gausia na faia ai le faaiuga ina ua faamalieina uma aiaiga o ata tifaga e talafeagai mo soo se tagata e maimoaina.

Ua fuafua ai lea faalapotopotoga e savalia le alii palemia ma ave i ai se tuualalo ina ia tapu ma faasā le Tautoga Gausia ona faaali i le atunuu.

Peitai e faailoa le lagona tetee o le faalapotopotoga ua mae‘a ona maimoaina e le toatele i Upolu ma Savaii i ni faaaliga faapitoa o le Tautoga Gausia.

O le toatele lava o loo faafiafiaina i le ata ma e leai foi so latou manatu tele i le auala na maliu ai le tama autū o le ata. Faaalia e Fiu atonu o le faauigaina lava lea a le tagata ia, ae o le vaega lona 2 o le ata o le a pueina i se taimi e lē o toe mamao, o le a faailoa ai le mafuaaga na maliu ai le alii o Sam.

E lei faailoaina mai e le alii pule pe na faapefea ona o le a faato‘ā iloa pe a sau i tua le Vaega 2.

Comments

comments