“Poo ā lava sauaga matou te tumau pea ile EFKS” … Rev Kerita Reupena

Rev Kerita Reupena ma lona faletua
Rev Kerita Reupena ma lona faletua

E lē o toe po se lilo ile silafia o le atunuu i le mataupu sa tulai ile va o le Komiti Faatonu a le Ekalesia EFKS, ma le susuga ile faafegaiga ia Kerita Reupena, o le faafeagaiga a le ekalesia EFKS Ipswich Brisbane Ausetalia na molia ai ile faamasinoga e le Susuga ia Kerita Reupena le Komiti Faatonu, ona o le latou faaiuga e aveesea le tofi Faifeau Toeaina o le pulega a Brisbane, sa umia e le Susuga Kerita Reupena.

O le masina o Aperila na tuuina mai ai le faaiuga a le faamasinoga, ma teena ai le tagi a le Susuga ia Kerita Reupena, ma ua faamautuina ai ma le iuga a le Komiti Faatonu, e tumau pea ona aveesea le tofi Toeaina o le Pulega e pei ona sa ia umiaina.

Na fesiligia e le Samoa Times se finagalo o le Susuga ia Kerita, e tusa ai o sona finagalo ile iuga ua tuuina mai e le faamasinoga. I se finagalo faaalia o le susuga ile faafeagaiga na ia ta‘ua ai, o le iuga a le faamasinoga ua iai nei e pei ona teena ai lana tagi, (dismissed) ua feteenai ma le iuga sa uluai faia ile masina o Me 2015, peitai, o le taimi nei o loo faatali le iuga tusitusia, o le a maua ai mafuaaga o le teena o lana tagi.

Na saunoa foi le susuga ia Kerita, “Ua ou talia le faaiuga a le Faamasino Sili, ma ua ou iloa ai foi le ituaiga tagata o loo iai le Faamasino Sili i lona valaauina.”

Ina ua fesiligia le Susuga ile Faafeagaiga pe o iai sona faamoemoe e toe apili le iuga a le faamasinoga, na ia saunoa manino ai, “O lo‘u faamoemoe mo le faamasinoga e lei mae‘a, e manatu lava e tatau ona faamae‘a, ma faauma lelei i tulaga masani e mafai ai ona iloilo e ni faamasino mai fafo le faaiuga ua iai nei.

O atugaluga o le Susuga ia Kerita, ona o le faaiuga lea ua aumai e le faamasinoga i lana mataupu, e telē sona aafiaga mo le lumanai, auā o le a sasao ai pea sauaga a latou o loo taitai faasaga i aulotu ma ekalesia.

E lē gata i lea, o le a atili ai ona faigata ona toe finauina ni mataupu faapenei e tulai mai ile lumanai.

Na ia ta‘ua foi o le faaiuga a le faamasinoga i lana mataupu, o le faitotoa ua tatala e olopalaina ai leo ma lagona o tagata lotu, ua soli ai foi aiātatau faaletagata.

“E manatu māmā i ai nisi ae a telē le mafatiaga e oo mai ona o faaiuga faapenei, ma o sauaga lava ia,” o le saunoaga lea a le susuga ia Kerita. Na ia ta‘ua foi, e lē o se amio Kerisiano le soli o le tuaoi tagata ma le amiotonu faalenatura na faia e le Auta.

I le faauigaina e nisi o le faaiuga ua aumai e le faamasinoga, e foliga mai ua tuuina atu e le faamasinoga le pule atoatoa, e saoloto ai faaiuga fai a le Komiti Faatonu a le Ekalesia, pe sa‘o pe sese, e faia pea le faaiuga a le Komiti Faatonu.

E ioe le susuga ia Kerita i lea manatu, e pei ona ia ta‘ua. O tagata uma e i lalo o le puipuiga a le Malo, a sauaina tagata i totonu o lotu poo le ekalesia, o fea e sulu i ai, poo lona uiga seiloga fasioti (tulou) se tagata ona faatoa lagona lea e tatau ona silasila i ai le faamasinoga.

O atunuu uma e aiāina e le malo faaiuga a ekalesia, e pei ona molimauina e matutua nisi sa galulue ma taitai foi i totonu o o latou ekalesia, ae sa tuliloaina lava e le tulafono ona o sauaga sa faia i tamaiti o le lotu.

Na faamanino foi e le susuga ia Kerita le eseesega o mea, e pei ona ia ta‘ua, e lē aiāina e le Malo le itu faaleagaga poo le faatuatuaga o tagata lotu. E ese ai la le itu faaletino e aiāina e le tulafono mataupu e aafia ai le ekalesia i itu faletino, auā foi e leai se isi e sili atu i luga o le tulafono. Ae afai la e pule saoloto le Ekalesia i tagata, ua tatau loa ona leai se Faamasinoga i Samoa.

E ui lava i nei fatia e pei ona taupeau ai nei le sā o le susuga i le Faafeagaiga ma le Ekalesia, peitai, na manino lava le saunoaga a le Susuga ia Kerita Reupena ina ua fesiligia, pe lē ono teva ese lana aulotu mai le ekalesia EFKS.

“Matou te tumau lava i le EFKS, poo ā lava sauaga, e lē liliu ai lava le loto.” Na ia saunoa foi o le finauga o loo fai nei, o le va ma le Komiti Faatonu ae lē o le Ekalesia. “O matou o loo saili ma finauina lo matou leo, ina ia maua le saolotoga e galulue ai i totonu o le Ekalesia,” o le saunoaga lea a le susuga ia Kerita.

Na ia ta‘ua foi ua mae‘a ona fai e le Komiti Faatonu lo‘u iuga e lē toe faaliloina lena mea, peitai, e aiā tutusa tagata uma ile Ekalesia a Iesu Keriso, e lē sili a‘e le aiā a le isi ile tasi, e tutusa piitaga, e pele le Ekalesia i le Komiti Faatonu, e pele foi le ekalesia ia matou.

Na faaalia foi e le Susuga ia Kerita le loto faanoanoa o tagata o lana ekalesia ile iuga a le faamasinoga, auā o loo moomia e lana aulotu le fesoasoani a le faamasinoga, ina ia tumau le aulotu ma tagata lotu i lo latou faasinomaga o le EFKS.

O le faanoanoaga lea ile faaiuga ua aumai, auā ua lamatia ai loto o tagata, ma ua faailoga fesili ai foi le mafai ona onosaia nisi tiga e toe faaopoopo mai.

Ina ua fesiligia le Susuga ile Faafeagaiga, ise lumanai o ia ile va ma le Ekalesia, aemaise le lumanai o lana auaunaga ile Atua o se Faifeau ile EFKS. Na ia saunoa manino ai, “E tumau lo‘u agaga ma lo‘u aiga ile EFKS, matou te tautua pea ile Atua e ala ile EFKS o lo‘u tupuaga ma lo‘u faasinomaga lea.

Ua tuu atu foi ile Atua lo‘u faamoemoe, pe auala mai ile faamasinoga se tali pe leai foi, ua silafia lava e le Atua mea uma.

“O mataupu faapenei ua tele ina liliu ese ai tagata lotu mai le EFKS, e mafua mai lava i faasalaga lē talafeagai, ae leai se taiala faaleekalesia e soalaupule ai ma saili ai se fofo mo mafatiaga o tagata, a tulai mai la mataupu faapenei ma teva ai le loto, ona alu ese lea o le Faifeau, ma mulimuli atu ai ma tagata lolotu,” o le saunoaga lea a le Susuga ia Kerita Reupena.

Ua lē tasi pe lua ona tulai mataupu faapenei i totonu o le Ekalesia EFKS e teena ai e tagata lotu faaiuga a le Komiti Faatonu, ma o se tulaga ua tatau ona toe lau sasaa i ai le tofa i taitai o le Ekalesia i ana faiga faavae, poo malupuipuia le aiātatau a tagata lotu faapea le Aufaigaluega mai faaiuga fai a le Komiti Faatonu, ma faaitiitia ai le tulai mai o mataupu faapenei ile lumanai.