Na malaga mamao mai lava le Sui Taitai o le Matagaluega AOG Samoa Ausetalia, o le taitai foi lea o le Pulega a Melepone, le susuga ia Ps Apouani Unasa e fai ma malo faaaloalogia na te fofogaina se upu faaleagaga.
O le autū o le faamoemoe o le popese ma taligafesili a le Ekalesia Oxley Assembly of God Church of Samoa. O le taitai autalavou, o le tofa ia Lealofi Lausei Pritchard, Failautusi o Lagi Pritchard ma le Teutupe o le afioga ia Tauiliili Fiti.
Na faafiafiaina le tamaitai o Bessie Pritchard, e pei ona manumalo ai i taligafesili, ma ia tauaaoina ai le pepa malaga fua i Samoa ma toe foi mai i le masina o Tesema. O le ipu o le tauvaga o le uo asiasi mai na maua e le faletua o le faafeagaiga ia Bessie Hytongue.
O le faletua foi ia Bessie Hytongue na ia mauaina le tulaga muamua i le taulaga e $5000.00 lana foai.
O le Team poo le Vaega sa manumalo i le pese o tauvaga pese o le po, na maua e le Team a Ruta; o le taitai o le fetalaiga ia Malagamaalii Ropeti Pritchard. O le tulaga lua o le Team a Orepa, o le afioga ia Taefu Sofeni Pritchard. O le Team a Naomi na tulaga tolu, sa taitaia e le afioga ia Tauiliili Fiti.
Na fai ma sui o le auvalaaulia le tofa ia Pouala Tusiofo Li‘o na te faaleoina se agaga faafetai i le Ekalesia ona o le fofoga taumafa ma faaaloaloga sa faatinoina i lea po. Na iu manuia le faamoemoe i le faatasi mai o le Atua.
O le susuga lava i le taitai autalavou le tofa ia Lealofi Lausei Pritchard sa avea ma fofoga o le po ma saunoa i tulaga masani ma le auvalaaulia, ma toe faafetaia le aofia i le tali mai i le faatalauula e molimauina le latou polokalame faaletausaga ua iu manuia.
