I le mae‘a ai o le Aso Sa paepae o le fanau i le masina na mavae atu o Oketopa, na amata tapena ai le autalavou a le Ekalesia First Samoan Full Gospel mo la latou polokalme faaolaola agaga (youth rally) e pei ona faataunuuina i le Aso Toonai na mavae atu.
Na maitauina le lagolagosua a nisi o Ekalesia ma a latou autalavou, aemaise o le afifio atu o le mamalu eseese o Samoa tainane nai a latou uo ma tauaiga, a o le tapuaiga mau a le aufaigaluega paia a le Atua ma faletua, na faatumulia ai le malu i le pitonuu o Coolaroo e ui ina sa louloua le tau ma toulu timuga.
O le susuga i le faafeagaiga taulagi ia Pastor Uiga Smith na tatalaina aloaia le faamoemoe o lana autalavou ina ua mae‘a le taulaga o viiga, faatuaao i le aofia na potopoto ma talamea faasolo ai loa le afiafi.
Matagofie viiviiga o le Matai sili na saunia ma lagiina e le aufaipese, a o le felanulanuai o aitema ma siva faaleagaga na momoli ai sao o uso a autalavou na soosootau‘au ma lagolago atu.
O le agaga maualuga na fofoga i ai le taitai o le autalavou a le Full Gospel o le fofoga foi lea o le afiafi, “E lē o se tauvaga ina ne‘i faoa e se isi le viiga e tatau i le Atua, ae o le mafutaga e faamasani ai tupulaga, ma toe ofoina faatasi a latou taleni o se taulaga mo le Atua.”
O le molimau ola lea e pei ona maitauina e le aufaigaluega totofi i lea po, o tupulaga Samoa ua ofoina olaga mo Iesu ma lana Faaolataga.
Na salani le polokalame atoa i le Upu faauuina na fofoga i ai le taitai aoao o le First Samoan Full Gospel i Ausetalia le susuga ia Elder Pastor Leivi Mulitauaupele mai le aai o Brisbane, na ia toe fafagu ai i tupulaga, “ua na o Iesu Keriso e matala ai noanoataga o le olaga.”
Na mae‘a lea sosoo ai ma le taumafataga matagofie na maau i ai le paia o le Ekalesia i Coolaroo, na tali ai le sua ma faamasni tupulaga aemaise o le aofia, ma ta‘ape ai ma le viiga ua maualuga ona o mea silisili ua faia e Ieova. Mo le autalavou a Coolaroo, o la a le Tusi, “e te faia e oe mea sili, ma e silisili ai lava.”
