Ua lagona e le afioga Leota Leulua‘ialii Ituau Ale le loto fiafia ma le faafetai i le Atua, o lea ua tali mai le tulafono e ala i se faaiuga a le Faamasinoga o Fanua ma Suafa, ua poloaina ai Alii ma Faipule o lona nuu o Solosolo ia toe foi atu i le osiga nuu.
“E leai se isi agaga ia te au ma le aiga o le fiafia, ma ua ou sauni foi e faatino tu ma aga masani mo le toe ulufale i le faiganuu a si o‘u nuu”. O upu ia na amata ai le finagalo o le afioga Leota ina ua fesiligia e tusa o le faaiuga ua aumai i lana talosaga na ave i le Faamasinoga o Fanua ma Suafa, ona ua ono tausaga o totua ma le faiganuu ae leai sana agasala matuia na faia.
O le tausaga e 2012 na faia ai le faaiuga a le Faamasinoga o Fanua ma Suafa ia toe foi le tamalii i le nuu ma sa talia lelei e Alii ma Faipule peitai sa lē talia le toe ofi atu i le faiganuu ina ua lē talia e Leota le finagalo o le nuu ina ia aveese ana tagi o loo i le faamasinoga faasaga i nisi o le nuu ma lona aiga.
Na toe tu le tootoo ma faatulai ese Leota ona o le mafuaaga lea ma le faamatalaga a Alii ma Faipule ua pelogia le nuu e Leota ona ua lē aveesea ana tagi sa i le faamasinoga.
Peitai o le faaiuga lea na fofogaina i le Aso Lulu ua mavae 28 Oketopa 2015, ua manino mai ai se vaega o le iuga e lē tatau ona faia se tulaga faapea ona o aiātatau a tagata e tusa ma le faavae o le Malo Tutoatasi o Samoa, aemaise afai e finagalo le nuu e aveese ni tagi a Leota mai le faamasinoga faasaga i nisi o Solosolo, o le fesili pe aisea ua lē faia ai se finagalo o Alii ma Faipule i isi matai ma tagata o Solosolo o loo iai foi a latou tagi i le faamasinoga faasaga i isi tagata o le nuu.
O le silasila a le faamasinoga e matuā leai se mafuaaga tatau o le faaiuga a Alii ma Faipule e taofia ai le toe oo atu o Leota i le faiganuu.
“O le finagalo tonu lea ua aumai e le tulafono ma ou te faafetai ai i le faamasinoga ona o le finagalo malamalama i le mataupu, auā ou te faapea atu ua ave i tua la‘u Su e $1.3miliona i le susunuina o lo‘u fale, ae o lenei lava e faauliulito le finagalo o matai”.
E pei ona silafia na aafia le maota o le afioga Leota ina ua aumai se isi faaiuga a le faamasinoga i le tausaga e 2012 ia toe foi i le nuu e mafua ona o le faateaina e Alii ma Faipule ona o le mataupu na vaeluaina ai Solosolo ma lua faiganuu.
O se faaiuga foi a le faamasinoga i se tagi a Alii ma Faipule o Solosolo faasaga i lea faiganuu fou, na faatonuina ai Leota ma i latou na lagolago ia te ia ina ia soloia le latou faiganuu fou ona e tasi lava le faiganuu i totonu o Solosolo.
Ua sauni nei lana afioga ma lona aiga e tapena mea uma mo le toe foi i le faiganuu, e tusa ma le finagalo o le faamasinoga. Na ta‘ua e se molimau o se tasi o le afioaga e faapea, o le Aso Toonai na tea nei sa fuafua ai se fono a le nuu e tusa o le faaiuga na fofogaina i le Aso Lulu ua mavae.
Peitai e lei taunuu lea faatasiga ona o loo iai ni taligamalo ma se maliu sa faia i le afioaga.
O le vaiaso nei la ua mautinoa e tusa o se faamatalaga mai lea molimau o le a fono ai Solosolo ma faia se latou faatatau i le finagalo ua avatu e le faamasinoga.
