Polesi atili le tomai kuka i Samoa

O le a maua e i latou o loo tautua i le matata o le saunia o taumafa poo le au kuka, se avanoa e fetufai ai metotia i le gaseseina o taumafa i ni sikaili ma tofo eseese, a o faagasolo le faamoemoe lea o loo talimalo ai le Iunivesite Aoao a Samoa (NUS) i le vaiaso nei.
O le asō la, 28 o Setema ua amata ai lenei semina tau aoaoga, o loo auai atu i ai se tasi ua lauiloa i Niu Sila i lenei foi tomai o le kuka, le Susuga Craig Lucas, mai le Aoga o Matata Eseese i Manukau (MIT).
O le auga o le faamoemoe ina ia fefaasoaai ma faaleleia atili tomai tau kuka, auā le tautuaina o faleaiga ma le tele o nisi o faataasiga ma sauniga faapitoa e moomia ai le lelei o lenei foi tautua i le itu o taumafa.
O le Aso Faraile, 2 Oketopa, o le a saunia ai loa se taumafataga o le aoauli, lea e tuufaatasi uma i ai aikia a i latou ua iai tomai i le kuka, faaopoopo i ai ma nisi mea fou e maua mai lenei aoaoga, ona tofo loa lea e taualuga ai lenei foi faamoemoe.
Taua e Mr Lucas, ‘e tele vaega eseese o le a talanoaina i lenei seminā.
O le a vaai i ni auala e faaleleia atili ai taumafa o loo saunia, tagai foi poo a tonu taumafa o loo sili ona moomia e tagata asiasi tafafao mai i le atunuu, aemaise lava le tulaga o le fuafuaina tatau o le seleni maua ina ia solo lelei pea lenei vaega o le tautua i nofoaga o loo faatino ai.’
O le susuga Mr Lucas o se uluai faiaoga lea mai Niu Sila i lenei mataupu,
ua oo atu i Samoa e faatino se aoaoga faapea, i lalo o se polokalame faipaaga a le MIT ma le iunivesite a le atunuu, le NUS.
I le amataga o le tausaga nei, na malaga mai ai mo le ono vaiaso le tamaitai o Elaine Leota, o se faiaoga mai le NUS, ma faia foi se fefaasoaaiga faapea i le MIT i Niu Sila nei, ma sa faapitoa i kuka o taumafa māmā ia e tao i le ogaumu (baking), ma ua nofo sauni foi la Leota e faafeiloai mai le taunuu atu o Lucas i Samoa.
‘O lenei polokalame faipaaga a iunivesite e lua ua amata tatala ai le avanoa mo nisi foi mataupu tau aoaoga o le a aoga mo tagata Samoa e le gata o i latou o loo aumau i Niu Sila nei, aemaise lava Samoa o loo aumau pea i le atunuu,’ o se saunoaga lea mai ia Dr Peter Brothers, o le pule sili (CEO) o le Manukau Institute of Technology.