O le masina na tea nei o Novema na laumanuia ai ni faamatalaga i se faamatau e mai se tasi o le aiga o Leafa Vitale na ta‘ua se gaioiga e faaoo le maliu i le Palemia ma le Faamasino Sili.
E tusa ai ma lipoti ua faasalalauina ua ta‘ua ai e faapea, na faia lea lafoga e se tagata i se inuga ava malosi o se fiafia.
O se fiafia e faapea sa auai ma le faipule o Palauli, le tofa Toluono Feti, ua ia faamaonia o tala ia na lafo e se tasi o taulealea o le aiga o Le’afa Vitale.
O se faaupuga na ta‘ua e le faipule o Palauli na lafo e lea tagata, pe a lē tatalaina i tua Leafa i le palola.
O nai masina e lei mamao tele atu na magalo ai le faasalaga soloatoa o Leafa Vitale mai moliaga e mafua i le tagatavaleina o le Minisita o Galuega, le afioga Luagalau Levaula Kamu i le tausaga e 1999. Na oo i le alii Palemia ia faamatalaga tau faamata‘u ma fautuaina ai loa le Komesina o le Matagaluega o Leoleo ma Falepuipui ina ia silasila i ai.
O le Komesina o leoleo na talosagaina se tasi o nusipepa i Samoa na latou muamua maua molimau i le tau faamata‘u, ina ia taofia le faasalalauina o se lipoti ina ne‘i afaina ai suesuega.
O le lua lenei o vaiaso talu ona faasalalau faalauaitele le faamatauina o le saogalemu o le soifua o le ta‘ita‘i o le Malo ma le Faamasino Sili.
O loo ilitata ma lē mafai ona gagana mai le faletua o Leafa Vitale ina ua fesiligia e le nusipepa. O le faamatalaga a le faletua ua valaau atu le ofisa faanofo vaavaaia, ina ia aua ne‘i talanoa lava i se nusipepa, se leitio poo se tusitala o se faletelevise.
O le tagatavaleina o Luagalau Levaula Kamu, na aliali ai le faamata‘u lava lea i le fasiotia o le Palemia ma le Faamasino Sili. Peitai o lea ua toe aliali mai i luma. O suesuega i le faamata‘u ua na o le Komesina o leoleo o loo ia silafia.
Ae o le Sui Sooupu e maua mai ai faamatalaga uma i mataupu tau i le matagaluega le afioga i le Komesina lagolago ia Leaupepe Fatu Pula, e leai sona silafia. “E faamalie atu, e oo lava ia i matou uma o komesina lagolago e leai se isi o iloa”.
E tuuina atu lenei lipoti mo le faasalalauina o loo faia pea suesuega a leoleo, ae e lē o mafai foi ona maua le komesina o le matagaluega mo se faamatalaga.
O le vaiaso nei e tatau ona toe taliu ai i Samoa le faigamalaga a le alii Palemia ma lana usugafono sa auai i le fono faavaomalo i mataupu i le suiga o le tau sa usuia i Mexico.
