Po ua gaosi le Aisa i Samoa?

Ole uta lena o pusa o fualaau na maua e leoleo mai le fale ose aiga i Vaoala
Ole uta lena o pusa o fualaau na maua e leoleo mai le fale ose aiga i Vaoala

“Ua toe tatala ai i tua i lalo oni tuutuuga faapitoa alii e to’atolu ma le tamaitai, na taofia mai e leoleo ile vaiaso talu ai.”

O lea mataupu, ua molia ai alii nei mai le matagaluega ale soifua maloloina ile gaoi a’o avea ai ma tagata faigaluega ale malo.

“Ae ole tamaitai ua molia i lona taliaina lea oni meatotino na maua ini auala faasolitulafono.”

O fualaau ma vailaau lea na maua ile vaiaso talu ai, na la’u i luga o taavale a leoleo pusa o fualaau mea tiga, ituaiga lea e sau ile pepa iila, ma ituaiga e aumai i fagu, o fagu vaitale ma isi vailaau. O masalomia o ia vailaau, e faamoemoe e gaosi ai le fualaau faasāina ole aisa.

I faamaumauga ale faamasinoga, e oo mai nei oloo taofia ai pea nisi o tama talavou, ile falepuipui i Tafaigata ile taumafai ai e faatau atu le aisa mo tupe maua.

Ole aisa lea na maua ile malaevaalele i Fagalii, ile taimi na alu atu ai le tama talavou e piki mai, ae maua ai e ofisa ole malaevaalele ma lipotia loa i leoleo. Ole afifi na aumai faafaamomoli mai Amerika Samoa ole tasi oi laua ua falepuipui faatasi ai nei ile aumaiga ole fualaau faasāina ile atunuu.

Peitai i faamaumauga a leoleo, oloo falepuipui lava foi nisi o alii na molia ile osofaiga ise fale i Afiamalu.

E to’afā ni taulelea na molia ai. I lena osofaiga na maua ai ile fale mea faigaluega, e gaosia ai le aisa.

Na talanoa ai le Komesina o leoleo, Egon Keil, o lona popolega i lena taimi, “ole saogalemu o tagata Samoa ma tagata asiasi mai, fua i mea ia na maua ile osofaiga a leoleo.

“Auā afai o lea e maua ai fualaau faasāina, e iai foi ma ni aupega. A tuufaatasi na mea, e otigatagata. Ma ose tulaga ua tatau ona mata’itu ele matagaluega.”

Peitai ile vaitaimi lava lea na maua ai le fale lea i Afiamalu, ae na maoga a’e ai foi ma se container ile uafu. Sa aumai i Amerika, ma maua ai foi ni mea faigaluega, e foliga e gaosia ai le aisa, faatasi ai ma ni aupega faasāina. E toatasi se alii na molia ai i lena taimi.

Ae faatusa ia Amerika Samoa, oloo molimauina mai ai foi le faafitauli lava lea e tasi. E ese mai fualaau faasāina pei ole aisa, ae o togalaau maruana oloo molimauina mai le ta’ape ai ile itu atu lea i Sisifo ole motu nei o Upolu.

Ole tupe vave e maua mai i fualaau faasāina ua tua iai aiga o tagata oloo faia lea solitulafono, e pei foi ona salalau mai ai tala ile maliu ose alii talavou i Satapuala e lata ise togalaau maruana.

O aafiaga o lena faaletonu na tasi ai le fono ale nuu o Satapuala e faatea ese le aiga o tagata o lotolotoi ile faatupuina ole faalavelave. Ua aafia ai meatotino, o soifua o tagata ua ma’umau, ae ole soifuaga o aso uma ua aafia, talu lava fualaau faasāina.

Oloo tumau lava le mau ase vaega, ua tatau ona faataga le totoina ole maruana ini tuutuuga mo le siitia ole tamaoaiga o Samoa.

Peitai, ole osofaiga lea i Vaoala ile vaiaso talu ai, na maua ai oloa o vailaau ale falemai, na masalomia e mo le gaosiga ole aisa, na talanoa ai le sooupu a leoleo, le susuga a Auapaau Logoitino, “ole aso 26 ole masina nei e valaau ai le faamasinoga ole to’afā lea e tali i o latou moliaga.