Pigi e Laauli le sauai a Lusia

Ua sisii lima o Parker male fusi ole WBO Oriental ina ua malo
Ua sisii lima o Parker male fusi ole WBO Oriental ina ua malo

E maoa‘e le manumalo a Laauli Joseph Parker ia Alexander Dimitrenko ile Aso Toonai ile Vodafone Stadium i Manukau ma toe mau ai le fusi ole WBO Oriental Heavyweight Belt oloo ia umia ile taimi nei.

E na ole lua male ‘afa taamilosaga ole taaloga ae faamuta loa e Iosefa le alii o “Sacha” mai Russia. E faalima ona pa‘ū Sacha Dimitrenko; ole pa‘ū lona lima na maua ai le oo ole alii ile tu‘i malosi a Parker, ma faataitaio ai le alii Rusia ma vili tiga ai i totonu ole maea.

E atoa le minute o tagi ma taavalevale Dimitrenko i totonu ole maea ma u‘u lona itu, ae ua alu foi male faitau a Marlon Wright, le laufali seia oo ile 10, ma manumalo ai Laauli ile tu‘ioti. Ole 21 ai lea o manumalo a Joseph Parker i fusuaga e 21 ae 17 malo i tu‘ioti. E matautia ia fuainumera.

Ile mae‘a ole taaloga na fesiligia ai le Russia, na ia faaalia lona lē fiafia, ile tu‘i o ia a‘o tootuli i totonu ole maea. Fai mai a ia, e lei tatau ia Parker ona tu‘i o ia a‘o pa‘i lona tulivae i lalo. Ma ile po anapo (Aso Toonai) na ia ta‘ua ai ole a fai lana tagi ona ole solitulafono a Parker.

Ole tali a Kevin Barry le faiaoga a Parker, ole meafua lea faitioga a Dimitrenko, auā e faalima ona palasi o ia i totonu ole maea ile na ole lua o taamilosaga. E lē gata ile pa‘ū o Dimitrenko ae ile faitau a alii faamasino uma e toatolu, na matuā mamao i luma le manumalo a Laauli ile 2.5 o taamilosaga.

Ole sikoa a faamasino e toatolu, Adam Height, Danrex Tapdasan ma Sawaeng Thaweekoon e 20 Parker ile 15 a Dimitrenko.

Joseph Parker ma lana faiaoga Kevin Barry
Joseph Parker ma lana faiaoga Kevin Barry

“Ua ou matuā ita lava ile faaiuga ale laufali. Auā nai lalo lo‘u tulivae, ae pa male tu‘i. Oute lei vaai atu o sau le tu‘i. E pito sili ai le faaletonu o tu‘i faapea, aemaise pe a lē iloa atu le sau ole tu‘i,” ole tagi talatala lea a Dimitrenko.

Na ta‘ua e Dimitrenko, na faailoa ile laufali lona lē fiafia. Ae ta‘u atu ele laufali e lei vaai o ia iai ile tu‘i a Parker lea na lavea ai.

O ia faitioga a Dimitrenko e lē o natia ai lona taavalevale i totonu ole maea e pei ose tamaitiiti laitiiti. E foliga mai ua gau le ivi ‘aso‘aso ole alii.

Ae na ia ta‘ua ile taimi ole feiloaiga male autusitala e lē o faaletonu ona ivi ‘aso‘aso, auā ana faapea o lea, semanu e lē mafai ona mānava, ae afai e lē o faaletonu lona ivi ‘aso‘aso, aisea na taavalevale ai ma faataitaio i totonu ole maea.

E matuā tatau ai ona fesiligia le mafuaaga na pa‘ū faafuasei ai i totonu ole maea ma faafoliga ua matuai tigaina lava, e peiseai o sana mea taufaasese na fai ina ia solia ai le fusuaga ma lē maua ai e Parker le manumalo. Auā ana gau lona ivi ‘aso‘aso semanu e lē mafai ona savali mai i fafo male maea.

Na fesiligia foi ele tusitala le alii Rusia pe aisea le mea na pa‘ū soo ai o ia i totonu ole maea. “Na tulei a‘u,” o lana tali lea. “Na tulei soo a‘u e Joseph Parker, ole mea lea na ou pa‘ū ai.”

Ile ma talanoaga ma Laauli ile Aso Faraile a‘o loma le fusuaga, na ia ta‘ua ai uiga fusu o Dimitrenko. Ole pue lea o lana paga ma fusi, ma faalagolago iai, ma taofiofi faapena.

Ole tali a Laauli a‘o loma le taaloga, ole a mataala i ia aga a Dimitrenko. E foliga ole tulaga moni lea na tupu i totonu ole maea, ole taimi lava e lavea ai le Dimitrenko i tu‘i malolosi a Parker, ona taumafai loa lea e fusi ma taofiofi Parker, ae ole vave ole migoi a Parker e sola ese mai e mafua ai ona pa‘ū i nisi o taimi.

Ae o isi ana pa‘ū ma matuai manino lelei lava le tuga o tu‘i a Parker i ona foliga ma lona ulu na mafua ai ona pa‘ū i lalo.

Ole malo o Laauli Joseph Parker ua faamausali atili ai lona avanoa e fusu ai ile fusi ole lalolagi. Ole taimi nei oloo faatalitali pea se tala mai le pulega a Joshua, poo ai lana paga ile aso 26 o Novema lea foi e taumate, pe lē o Joseph Parker.