O le Aso Sa ananafi, aso 19 o Tesema ua atoa i ai le valu o aso talu ona amataina le polokalame o le sefulutolu aso, o pesepesega mo le Kerisimasi o le tausaga 2010. O le polokalame o loo faatautaia e le ekalesia EFKS i Magele i Sasa‘e, Le Puaseisei.
O le susuga i le faafeagaiga i Victor Pouesi ma le faletua, faapea ai le mamalu i le vaesga o a‘oa‘o, tiakono, ma tulaga tofi eseese o le ekalesia. E lē gata i lea a o le paia ia Samoa potopoto, i tamalii ma failauga o faletua ma tausi, o Saoao ma le malosi o le ekalesia e oo lava i fanau. O se polokalame ua tele foi sona sao ma sona tāua mo le toatele o aiga o le atunuu, talu ai o feau tāua o loo momoli ai le agaga o le Kerisimasi, a o agai mai mo lenei foi tausaga.
O loo faasalalauina tuusa‘o e le Radio Samoa, mai lava i le itula e fitu i le afiafi talu lava ona amata mai i le valu aso ua tuanai, ma o le ala foi lea ua mafai ai ona maua ma faafofogaina e soo se tasi lava ona o le galulue faatasi o le ekalesia ma le Radio Samoa.
E tele aulotu ma autalavou mai ekalesia eseese i totonu o Aukilani sa valaaulia, ma maua le avanoa e faaleo ai ma fofogaina ai feau tāua ma le faatupu manatu e ala i viiga ma pesega malie ma le matagofie.
E tusa ai ma lipoti ma faasalalauga, o loo ta‘ua ai le tele o nisi o kamupani ma pisinisi o loo lagolago ma fesoasoani e ala i le faatupueina o fuafuaga ma le tuufaatasia o le polokalame.
O le lua ai lea o tausaga talu ona amata ma faagasolo lea foi polokalame mo le faafofogaaga a le atunuu. O le tausaga muamua o le tausaga na tea nei 2009, ma le lona lua lenei e pei ona toe faatinoina ai lea lava faamoemoe.
E lē gata i autalavou ma aulotu e autovaa ane ma faaaogā le avanoa, ae faapea foi le aufaigaluega a le Atua, mai fata faitaulaga eseese o loo laugaina ma faaleoina foi le feau momoli a le Atua, e ala i lana Afioga Paia.
Ua molimauina e le toatele e pei ona sa talanoa atu i ai, le matagofie ma le tāua foi o lenei fuafuaga talu ona amata mai. Ona e lē gata ina momoli vave mai ai le agaga ma le manogi o le Kerisimasi, ae faapea foi le tele o feau aogā ma le logolelei e ala lava i pesega ma upu faalaeiau.
