Na avea le falemai faaitumalo i Satupaitea i tausaga e tele ua tuanai ma faaola totoga i gasegase mai nuu ma afioaga o le itumalo o Palauli ona sa latalata atu mo siiga ma’i ma gasegase tau savali, auā e mamao tele le falemai Tuasivi e tu i le itumalo o le Faasaleleaga.
Ina ua faia le faaiuga a le Malo e tapuni i le tausaga e 2000 na agai gasegase i le itu Salega i le falemai faaitumalo i Foailalo ae agai gasegase mai Palauli ma lona itu i Tuasivi ma agai mai i Apia nisi siiga gasegase.
Sa faigata tele le tulaga sa iai ina ua tapuni le falemai i Satupaitea. Ina ua filifilia e le itumalo o Satupaitea le afioga Lautafi Fio Selafi Purcell e avea ma faipule i le Palemene e aunoa ma se palota na faia, o le tasi lea o galuega na moemiti iai le faipule ia toe fausia ia lelei atoatoa ma toe tatala le falemai.
O le Aso Faraile ua mavae na tini taunuu ai lea miti a le sui faipule o Satupaitea, aemaise o le faipule o Palauli i Sasae le afioga Tuifaasisina Risati Leleisiuao Palemene auā o lona itumalo e sili ona lata ane iai. E faapena foi i le faipule o Palauli le Falefa le afioga Faumuina Tiatia Liuga, auā o afioaga o lona itumalo faafaipule o Sili, Gautavai, Gataivai, ma Papa e lalata ane i le falemai i Satupaitea. E 120 afe tala Amerika le fesoasoani a le Malo o Iapani na toe fausia ai le falemai atoa ma le vaega e taunuu iai gasegase mo le vaaia o se fomai.
O le isi vaega o le galuega ua saili fesoasoani ai le faipule o le itumalo le afioga Lautafi ina ia mafai ona fausia se nofoaga e taofia ai gasegase ma se maota e faamautu iai se fomai. O le tasi lea o faafitauli o loo feagai ma falemai faaitumalo o le faatasi pe faalua ona oo iai se fomai, ae o le tele o taimi o tausi soifua lava e gafa ma le vaaia o gasegase.
O aso e le maua ai se fomai i falemai faaitumalo e malaga uma lava i Tuasivi gasegase, ae o le tasi lea o fautuaga a le komisi suesue na silasila i le toe tuufaatasia o le soifua maloloina i se pulega e tasi, ia maua pea se fomai i falemai faaitumalo i aso uma o le vaiaso.
E toagaogao le aufaigaluega a le soifua maloloina i fomai ma tausi soifua ae o le agaga lea o le Malo ia siitia ma faaleleia atili pea le auaunaga tāua mo le soifua lelei o tagata o le atunuu.
