O loo tālia i le taimi lenei se faamatalaga a le Auaunaga faafomai a le Soifua Maloloinia i se fesoasoani e mafai ona ofo i se pepe e igoa ia Anastasia Anthony, ua tea i tua i lona aiga ae o loo iai se patu i tua o lona ulu ua foliga mai o se isi ulu ua pipii i le tino e tasi.
O foliga ia o pepe Anastasia e mumusu ai lona aiga e faalauiloa ma na umi se taimi o faatalatanoa le faiga o se lipoti ma le faamatalaga na ave i ai, atonu e aogā nei lipoti i se fesoasoani e ono maua mai mo Pepe Anastasia, aemaise o lea ua faatea i tua ae e lei mautu se faamatalaga pe saili se auala e mafai ai ona aveese le isi ulu lea ua pipii i tua o le isi ulu o le teineitiiti.
Na faaali e le aiga, o loo saili foi o latou aiga i fafo mo se fesoasoani ma o loo faatalitali pea ae na ta‘ua e le tina o le pepe, na lelei mea uma i lona ma‘itaga auā o lana pepe muamua lenei, ae e faateia i le fanau mai o pepe o loo iai le “patu” lea.
O le sailiga a tusitala na faataga i le nofoaga ua iai le pepe i lona aiga na vaaia ai e foliga mai ua amata ona iai mata, o taliga ma le isu i le isi ulu lea. E malosi lava pepe i le aotelega o lona soifua maloloina. O le faaaliga a le Alii Ofisa Sili o le auaunaga, o lea faatoa toe amata ma e lei iai i le Ofisa i le taimi lea na fanau ma lagalagā ai lenei mataupu ma e lei oo atu se lipoti e faatatau i lenei teineitiiti.
O lea ua ia faatonuina se lipoti mai le aufaigaluega na nafa tonu ma le fanauga o le pepe aemaise o se tala i le tulaga lea e ta‘ua o se “patu” poo se isi ulu ua faaopoopo o le teineitiiti. Faaalia e le afioga Leota Laki Lamositele, afai o se ulu ua pipii atu i le tino o Anastasia o lona uiga e oo lava i Niu Sila e lē mafai ona o latou faia se taotoga faapitoa auā o le tele o ituaiga taotoga faapenei e faatino i atunuu e pei o Amerika. Ae se‘i vaavaai lelei le auaunaga i lenei mataupu ona mafai lea ona fai se isi gaioiga e faatatau i le pepe fou lenei.
E lē o mautinoa se taimi na tulai mai ai se mataupu faapea, ae o atunuu i fafo ia e lipotia ai masaga e fananau mai e pipii faatasi vaega o le tino (Siamese twins) ma e foliga mai o le itu lea na tau agai i ai Anastasia ae e foiga mai ua lē atoa le tino o le isi pepe ua na o le ulu lea ua pipii i tua o le ulu o Anastasia.
