Ua 17 tausaga o galue ma avea o se faifeau o le Ekalesia AOG itu palagi le susuga ia Ps Motu Elia mai Puleia i Savaii. Sa avea ma faifeau a o faaipoipo atu ia Mutoto‘a (Poutasi Falealili) toe faaipoipo atu ia Pele (Fogapoa) failagi uma folauga.
Na fai toatasi mai le galuega i le 2004 peitai sa lē atoa foe e alo ai le sā o le galuega, o lea na mautu ai lona finagalo e faaseetuāgalu ae saili se faifeau o le Ekalesia AOG itu Palagi i Garden City. O le tausaga lenei na siiaao ai le Ekalesia i le susuga ia Siliato ma le faletua ia Tine Va‘ele (Lefagaoalii Safune, Niue ma Matautu Apia) e fai ma o latou faifeau. Sa avea i laua ma A‘oa‘o i se Ekalesia AOG i Niu Sa Uelese.
O le taeao o le Aso Toonai aso 2 o Fepuari, na faataunuuina ai le tatalaina o le feagaiga a le Ekalesia ma le susuga ia Pr Motu Elia ae osia ai le feagaiga fou ma le susuga ia Siliato Vaele ma le aiga. Sa taitaia le sauniga e le susuga ia Ps Komisi (sui o le Komiti Aoao) ae feagai le susuga ia Titi Taulapapa (Sui taitai Matagaluega) ma se upu autū o le aso.
O le susuga i le Taitai ia Ps Onesemo Pulepule o ia o le Taitai Aoao a Ausetalia, sa feagai ma le faapaiaina o le faifeau fou ma le faletua.
O le afioga ia Vaele Iulio sa fai ma sui o le aiga e molimolia ma faaeva mai measina ma le momoliga o le faifeau.
Sa fai ma fofoga o le aso le aao tusitusi a le Ekalesia a Garden City, le fetalaiga ia Talailevave Veli Elia, auā faaaloaloga masani ma nisi o matū palapala auā le paia i le aufaigaluega totofi a le Atua ma le auvalaaulia.
Sa fai foi le faatau paia a le atunuu ma tasi moemoe ai le tofa ma le moe i le afioga ia Tuioti mai Falelima e molimolia se agaga faafetai i le Ekalesia faapea tauaiga o susuga i faafeagaiga.
