Le tina ia Nani Tunufa’i ma si ona alo o Matini lea na aafia ile faalavelave

Le tina ia Nani Tunufa’i ma si ona alo o Matini lea na aafia ile faalavelave

O upu ia na saunoa ai le tamā matua ia Tunufa’i Faapo 65 tausaga mai le afioaga o Salua i Manono ina ua logo atu le tala ile faalavelave ua tupu ile pasi ile Aso Toonai na tea nei, 27 o Ianuari ile tuaoi tonu o Puipaa ma le afioaga o Faleula.

Ta’ua e Faapo ile Talanoa mai Samoa, o ia sa faamuli mai i lo latou aiga i Manono ae tamoe atu se tasi o tuafafine ma logo atu le tala e uiga ile faalavelave.

Na pei e nofo lana mānava ma pogisa atoa lona mafaufau, ua ia lē iloa poo le ā le gaioiga ole a fai, peitai na faamafanafana atu lea tamaitai ia te ia ma agai loa e tau saili se taavale e tilitili mai ai ile falemai.

A’o agai mai ile falemai i lea aoauli e lei mafai ona ia tautala ona o lona mafaufau atoa isi ona toalua ma si ona atalii.

Ose faalavelave na tau lē mafai ona faamatala e lea tamā e pei ona ia ta’ua, ose faalavelave matuia tele lea i lo tatou atunuu pe a fua atu i nisi faalavelave natulai mai, ae faafetai ile alofa ma le agalelei ole Alii ona ua ia faasaoina si ona toalua ma lona atalii.

O lagona nei na faaalia ele tamā isi ona siufofoga e tau lē lagona ma ona loimata ina ua taunuu atu ile falemai ma ia mautinoa ai oloo soifua pea le tina ole aiga ma si ona atalii.

Na molimauina ele Talanoa mai Samoa le faatumulia ai ole maota gasegase i Ulumototua ile Aso Toonai, e lē gata i alii ma tamaitai leoleo, ole toe valaau faatopetope ai o nisi o alii ma tamaitai fomai mo se galuega fesoasoani faatasi ai ma le sau ole solo o tagata mai Aiga ile Tai e tau sailia o latou aiga na aafia i lenei faalavelave.

Le tamā ia Tunufa’i Faapo ma lona alo o Matini ina ua mae’a togafitiga ile falemai

Le tamā ia Tunufa’i Faapo ma lona alo o Matini ina ua mae’a togafitiga ile falemai

Na faaaloalogia ele Talanoa Mai Samoa le tele o aiga o i latou na aafia e ala lea ile ofo atu iai ose faamafanafanaga peitai ole loimata maligi lava na vaaia i lea aso.

Na mulimuli mai le tatou nusipepa ile vaega tonu o paka ai taavale e pei ona maua ai se avanoa e faatalanoa ai le tamā ia Tunufa’i Faapo ma si ona toalua faapea le atalii.

E tele lava le mau faamatalaga eseese i lenei faalavelave e pei ona tuua’ia ai foi e nisi le avepasi ona ole saoasaoa tele peitai na molimauina foi i lea aso le tumutumu ai o aiga ma uo ole alii avepasi ile maota maliu i Ulumotootua ona ole maliu ai o lē na faafoeina le pasi le susuga ia Meafou.

Ose aso pogisa tele ile itumalo o Aiga ile Tai lea Aso Toonai aemaise ole toatele o mātua ma le pasese na malaga mai i faatauga mo fanau auā le sauni atu e toe amatalia aoga ale fanau mo lenei tausaga.

O isi faamalataga o lea faalavelave na ta’ua ai ese tasi o alii leoleo le faatinoina o a latou suesuega ile vaega tonu na tulai mai ai le faalavelave e ala lea ile tau sailia o meatotino ale pasese aemaise ole pusa sa iai totonu tupe ale avepasi, lea e taunuu atu leoleo ua leai ma se mea o totoe ai ile pasi, e oo lava i tupe siliva ale pasi ua alu uma lava.

Ole telefoni feaveai ale avepasi, fai mai lea alii leoleo, e vili atu oloo tatagi pea ae ua leai mai ile vaega tonu na tupu ai le faalavelave. E na’o le pau vaega na maua atu i suesuega a leoleo e na’o keke puaa ua salalau solo i luga ole auala.

Masalo ose oso ase tasi ole pasese na faatau atu i sefe keke puaa ile maketi i Apia ma le faamoemoe mo le fanau o faatali mai i Aiga ile Tai.

O lona uiga ole toatele lava na mafai ona fesoasoani ile faasaoina o soifua na aafia ile faalavelave ae mautinoa foi na fesoasoani le isi vaega e sailia ai a latou mea aogā mai i lea faalavelave.