“E sefulutasi tausaga lou faasalaga i le falepuipui”…Faamasino
Ua lē faatasi ona aliali mai i Samoa solitulafono faasino i le tapueina o ata matagā i telefoni feaveai poo cellphone, ona faasalalau lea i luga o fesootaiga faatekonolosi faaonapo nei, ma ua aliali atu ai le matagā i le lalolagi aemaise o o tatou tagata o loo mafai ona silasila i ai.
Ua lē faatasi ae ua faatupulaia nei ituaiga o soligatulafono e ta‘ua o cyber crimes. O le alii 27 tausaga mai Mulivai Safata na ia faia se gaioiga faapea i se tamaitai 19 tausaga le matua o lo latou nuu. O se tamaitai sa fai se la faigauo e faapea na amata i le tausaga e 2011.
Peitai o le tausaga e 2013 na tulai mai ai loa se gaioiga a le alii na faamatalaina e le faamasinoga, o se faiga faameaola na aafia ai le tamaitai sa avea ma ana uo. O Iuni o le tausaga lea e 2013 sa inupia ai le alii 27 tausaga ma nisi o ana uo, ae sa ia vaaia ai loa le tamaitai o savali atu i le auala.
Na ia alu i ai ma la talanoa ma fai atu i ai le tamaitai e sili ona alu e faaauau le latou inuga. Peitai sa mulimuli atu lava le alii i le tamaitai ma ia tatai ai loa le mafine i se nofoaga e faapea o se togavao e mamao ma le aai e leai nisi e nonofo latalata atu i ai. O le nofoaga la lea na faatino ai e lea alii se gaioiga solitulafono.
Na ia faatonu faamalosi le tamaitai e aveese ona laei ma ia avane ai lana telefoni feaveai ua pue ai le video o le tino o le tamaitai. Na ia faia foi se faigaaiga faamalosi ma lē na aafia. Na aliali mai foi i suesuega a le faamasinoga i molimau na tuuina atu e leoleo, sa faia le solitulafono e lea alii ma le faaaogāina o se malosi uigaese, atoa ai ma lona sasaina o le tamaitai i se lala laau pe a lē faia le mea e manao i ai.
O nisi o gaioiga na ia faia o le a taofia le faasalalauina, ona o le matagā ma le ogaoga lea e mafua ai le saunoaga a le afioga i le faamasino o Vui Clarence Nelson, e pei o se faiga o se meaola na faatino e le alii i le tamaitai.
Na mae‘a le gaioiga na ia faia ona ia fai lea i le mafine e aua lava nei ona ta‘ua i se tasi. O le aso na te faia ai lea tulaga o le a ia faasalalau loa le ata na ia pueina. Peitai o le fā masina talu ona tuanai lea gaioiga ae maua e le tamaitai faamatalaga mai nisi o lana vasega i le aoga sa aoaoina ai, sa latou vaaia lona ata matagā i le facebook.
E oo foi lava i tagata o le nuu ma lona aiga sa latou iloa lea tulaga. O le amataga lea o le oo o le mataupu i leoleo ma faia ai loa suesuega ma molia ai le alii o Sueni Galumalemana.
E iva moliaga na faia e leoleo ma sa tetee i ai. O le suesueina o molimau a leoleo na nafa ma se laulau o faatonu lea na latou faamaonia le moliaga o le toso teine poo le faiaiga faamalosi ma se tamaitai e aunoa ma le loto malie i ai. O isi moliaga na mulimuli ane na faamaonia e le faamasino na nafa ma le mataupu.
Na saunoa le alii faamasino le afioga Vui Clarence Nelson, o se tasi lenei o solitulafono ua aliali mai ai, e ese le silafia ma le aoaoina o olaga o tagata i Samoa i le lotu ma le faakerisiano, ae ese mea o loo tutupu ma aliali mai.
O se lapataiga lea mo i latou e faia lenei solitulafono ia mautinoa o le falepuipui lava lo latou iuga.
