O foliga vaaia na oloo iai le malumalu Iupeli ale EFKS mai le auala tele ile taimi nei faapea le vai laumei o loo lumafale mai iai.

O foliga vaaia na oloo iai le malumalu Iupeli ale EFKS mai le auala tele ile taimi nei faapea le vai laumei o loo lumafale mai iai.

 

Ua uma atu tausaga e 2015, 2016 ae lei uma lava ona fau le malumalu fou e suia le malumalu Iupeli tuai sa ile lotoa ale Kolisi faa faifeau ale Ekalesia Faapotopotoga Kerisiano EFKS i Malua.

Faamata e uma ile tausag anei le Iupeli ma faapaia ile taimi ole fono tele 2017? Ose fesili e lei tau faatalia se tali ale failautusi aoao ale EFKS, Susuga Vavatau Taufao, “o lenei lava e tau tulituli atu iai le malosi.”

Ua faaleo mai, ole faamoemoe lea ua talosia ai nei, ina ia maea ile masina o Aperila ole 2017, ma faapaia ai ile taimi ole fonotele faaletausaga a taitai ole ekalesia ile tausaga nei lava.

Ae o na fuafuaga uma e faataunuuina lava, pea fai e tusa ai ma le tala ile tau. Ona o lea foi ua fai ma pau mai timu, ae o lo o iai pea tatou ile vaitau o afa, peitai ole faamoemoe ina ia faamaea ai le galuega tele ua faitau tausaga nei talu ona faatalitali ma tulimataia.

E le gata ai o tagata lotu ae o tagata femalagai ole auala e uia lea vai aai ole ekalesia ile agai ane ile taulaga ma le malaga atu ile malaevaalele.

I le amataga mai o faamatalaga faamaumauina o tala ole galuega na faalauiloa ai e le Failautusi aoao ale Ekalesia o lena vaitaimi 2014, le alii Loia ae ole faifeau foi, le Susuga Iutisone Salevao, gasologa ma le faamoemoe ole galuega, i kamupani sa tauofo ma latou maua le faiga ole faavae, ole falealuga ma le ato, atoa ai ma le sima ole kamupani Saina ale Shang hai.

Peitai ile talanoa ale Failautusi ua ia faaauau mai le galuega ole malumalu Iupeli, ua maitauina ai le toe faaopopo ai o isi kamupani faufale ile faatinoga ole galuega.

“Ua leva ona uma le Shang Hai.”  Ae ua faaauau mai ai e le kamupani ale Diamond Head. O lesi kamupani ale VW, ole vaega o faia le blaster ma le faaalo, o retaing wall, ma le inisiniaina o gafa ma le kamupani ale Ott.

Ile talanoa ale failautusi, ua tele kamupani eseese ona ole sailiili lava ile tau ma le lelei atoatoa ole malosiaga, quality ole malumalu. Ole faamoemoe lava ia lelei le tau ma taumafai atu lava ia uma le ile taimi ole fono.

E lei mafai ona talanoa Vavatau ile tulaga tau tupe ua faaalu ai ile fauina ole malumalu, peitai sa nao na ia faapea mai, e masalo ua silia ile $10miliona tala le tau, ae e mafai ona maua le tau ole galuega mai le itu o vaaia tupe.

O loo malaga i fafo le susuga Rimoni Wright o gafa ma le itu o mea o tau tupe ale Ekalesia ae ole maitau foi lea a se tasi o tausitusi ole ofisa, e oo mai ia Tesema ole 2016 ua oo atu ile $13miliona le tau ole galuega e ese mai i tupe ua faaalu ile tausaga lenei.

Ole aitalafu tupe ale ekalesia mai le NPF, lea na talanoa ai le failautusi “a oo atu lava ina uma le galuega ae o totoe se tupe, e toe faafoi lava ile NPF se tupe e totoe.”

Ae ole faalauleleiina ma le faamatagofieina ole siosiomaga ole malumalu, e aofia ai ma le toe faamalosia lea o auvai ole vai laumei i luma ane e pei ona saunoa iai le failautusi a lava le malosi e toe faaaulelei atu ai ma le vai laumei.

Ole vai laumei lenei sa fai ma mataaga e matamata fua ai tulisi ma le lautele o tagata femalagai i lea vaega ole auala tele. “E leai se fuafuaga o iai e tanu le vai laumei, ona o loo iai lava meaola ile vai.

Pe toe fa laumei o loo totoe ai ile taimi nei, ae ole tele ua uma ona tapue e le Matagaluega ole Siosiomaga MNRE ma toe faasosola ile sami.” Ae talitonu le failautusi “e oo atu ile tausaga fou, ua toe maua foi nisi laumei.”

I le maitau atu ile tulaga o iai le galuega ma le taimi o totoe ona tauaofia lea ole fonotele i Malua, e faigata ona ioeina e ono mafai ona maea le galuega, peitai, o galuega faatasi ma le tatalo e mafai ai vavega tatou te fiafia ma ofo ai.