“O la’u faalogo atu pei lava e toalima faipule ole HRPP” la e ua lilifa e faatū le latou tama faa-Palemia, a’o talitali ai se tala ile soifua maloloina ole Palemia, a’o iai i lana siiga ma’i i Niu Sila.
Ole mataupu lenei, e ui ina ua agiagia ai nei foi le fu’a ale Blog “Ole Palemia” ma lana ia foi faasalalauga, i fono faalilolilo ile vaiaso talu ai ase vaega o faipule ole HRPP, ae e oo mai nei, oloo Sui Palemia lava le Afioga a Fiame Naomi Mataafa, ae oloo avea ai le Susuga a Papaliitele Niko Lee Hang ma Palemia lē tumau, a’o toesea lana afioga ile Palemia ma le atunuu.
E faigata tele ona maua se faipule e finagalo e faailoa lona suafa i mataupu faapenei, ae ole agaga ole tasi faipule ole HRPP oloo avea nei ma se tasi o Minisita lagolago, “O a’u ou te matuā ofo lava ile tala lea ua pa mai.”
E leai sona ia silafia ile mataupu, auā e mamao lava lona vaa mai faiga faaalatua lea ua salalau ai nei tala. Peitai ile tala ale tatou paaga faamoemoeina, ole faalogo atu iai ua toalima i latou oloo taumafai e fafau mai tua se isi palemia fou. Na ta’ua foi ele paaga faamoemoeina, “Afai e toalima pe toafia foi, ae ua amata ona liki mai i tua a latou faufauga o fai nei, o fea la o iai se maopoopoga ma se tutu faatasi?”
Ua toe manatua ai foi le vaitaimi na lug a, la lo ai foi le HRPP, ile finau atu a ona faipule e faasagatau ile afioga a Faumuina Liuga a’o avea ma Minisita ile paeaiga talu ai. Sa le gata ina faia le sainiga lima ma lagolagoina ese vaega o faipule ole HRPP, ae sa faaopoopo atu foi iai ma le tusi ale tasi o faipule sinia e lagolago ai le pepa ole sainigalima.
Ole molimau ale tatou paaga faamoemoeina, i lena tusi faasaga ia Faumuina, e iai lava faipule laiti ma faipule sinia foi e lei saini ile tusi. Na fesiligia le tasi o faipule talavou ole maota, pe aisea na lē saini ai ile tusi, “ile vaitaimi o lena tusi, sa ou oo lava i toeaiina o lo’u itumalo, ona ole latou tofiga ma le latou taitaiga na afua ai ona ou maua le nofoa ile palemene. Sa fesili i taitai o nuu, sa fesili i toeaiina ise fautuaga, ma latou fautua mai ai, ’alo’alo ese oe ma na mea.”
Ma sa ia onosaia ma usitai ile fautuaga a tamā ole itumalo mai lava i lena taimi e oo mai nei. “O lea foi la ua toe faalogo atu i lenei mataupu ua mapuna a’e a’o sii gasegase le taitai i Niu Sila, e faanoanoa ai lava lo’u tagata.” Peitai ile talanoa ale tatou paaga faamoemoeina, “o e fetotoa’i ai o faipule ole HRPP mai lava i la vaitaimi, pei ole maliu ai osi faipule ia Luagalau Levaula Kamu, ma faasolo mai ai ile mataupu ia Faumuina Liuga, sa faapea le atunuu ua avatu le faamoemoega ile HRPP, e le toe faalogo atu ini faufauga faapenei, aemaise lava oloo sii ma’i le latou taitai, poo le afioga ile alii Palemia, ia Tuilaepa Lupesoliai Sailele Malielegaoi.”
I luga o upega tafailagi, ile Blog “Ole Palemia,” ua talatala faafagogo mai ai nei se vaega ole talafaasolopito o aga faapolokiki i Samoa ma le faigamalo ale HRPP, e faatatau ile maliu ai o Luagalau, mai lona vaega 1, 2, 3, 4, 5.
O na faamatalaga uma, ma na faasalalauga, e oo mai ile taimi nei oloo tau matemate lava poo ai le “Ole Palemia”, peitai ua faamautuina mai e le tatou paaga faamoemoeina suafa o faipule ole Palemene o Samoa o iai nei, ma faipule na faia’ina ile palota talu ai, oloo latou fafagaina faamatalaga ile “Ole Palemia”, ua ta’ape atu ai ile lalolagi atoa, talaaga o Samoa, o aso nei.
E moni ai le tala ale Palagi ia Samoa, “koe oki lava kakou ia kakou.” Ole Aso Lua ole vaiaso nei na tuu e fono ai le Palemene, peitai e le o mautinoa pe taunuu, e pei ona ta’ua e se tasi ole pulega ole maota.
