O le autu na faamamafa ia le tautalaga a le susuga i le faafeagaiga ia Rev Lale Peteru o le fatu solo o le lagi solo foi lea a le aufaipese lauiloa o le Punialavaa, i le po o le aso Toonai i le faamanatuina o le 50 tausaga o le Punialavaa e faapea, “O le mana o fatuga” o pese ma fatuga o oloa poo taumafa o le mafaufau, e fesootai ai le tino ma le mauli poo le tagata lilo. E tausani manu felelei e gasese lau o laau pe agi fisaga pe ele foi le savili, e fafati galu ma gogolo peau o le sami pea lutaluta le matagi, e lilino vanu ma pati lima vaitafe.
O leo eseese na o pesega o mea a le foafoaga, o le siosiomaga vivii, o le ata lena o le mataisau na faia le foafoaga uma, o lo tatou Atua e ofu i viiga. E faapena fatuga anoa, e manatua pea ma le mavae le malie e ulu i tino ma ivi, e maona ma toafilemu ai mafaufau ma lagona, ma le faagaeetia ai le tagata. O le tatou faiva lea ua faasaga iai, o le fatu solo ma lagi solo, pe faaletino pe faaleagaga foi.
O le fetii fou o fatuga ua tapenaina nei, ua faaulutalaina o le Punialavaa o ananafi o le aso ma a taeao. Sei toe tepa i tua i le 50 tausaga o lana anava fatufatu, mai kitara manoa e oo mai i le meliniuma fou ma le faaaogaina o tenekolosi fou, e faapea foi i le faaaogaina o tagata popoto i le taina o mea faili mo puegapese, mai le tasi le tala i le pese i le 2ap i le vaitaimi o le 1970 seia oo i le faatau atu o pese i cd i le 1980 ma taimi nei ua maua ai tupe.
O fatuga faaSamoa, e leai se faamoemoe e maua ai se tupe, o le faanaunauga ia faamalieina le faasausauga a Samoa. O le auala e tuu gutu ma tuu taliga ai tala o ananafi mo tupulaga o le lumanai. Le ananafi o lo ta faasinomaga e a’oa’o mai ina ia sosoo le fau ma le fau ia ta tu ma aganuu faaaloalo mo tupulaga o taeao.
Ia le mavae le ili a ia ona o le agi mai o matagi o suiga fou nei lelea pe pau le faleolo o le ta tamalii aga ma la ta gagana. Pe leo le itu lea ua mativa ai le agaga fatufatu o pese Samoa i aso nei ua toatele tupulaga e fiafia i pese Samoa i aso nei, ae ua leai ni fatu pese.
Ua mativa le agaga fatufatu o aso nei, ua naunau tagata i le lauiloa i fatuga i luga o tusi fetaliai le facebook ma le ofe mo oe le youtupe. O le mafuaaga foi lea o le tele o le usu o pese ma le leai o se faanoi. Na fesili le fanau pe mafai ona sui faaonapo nei le taina o pese? Ae na tali le faifeau iai e pei o la a Iesu i lana faataoto, pei ona famauina e Luka i le matau e 5, e uiga I le fonoina o le ie tuai i le ie fou, ma le utuina o le uaina fou i le fagu pau tuai e mautinoa o le a papa fagu pau tuai. O le gagana o fatuga, o le taina o pese i le faiga fou, ia faautauta, fai mai le poto faaSamoa aua le naunau i le i’a ae manumanu i le upega. Aua le naunau i le pao faaonapo nei, ae sese ai le agaga o le pese.
O le gagana o fatuga e pei o le aputi e afiafi ai mea lilo, vagana ua tatala faamau faailoga ona malamalama lea iai. O pese ma fatuga ua aoaoa mai ai ia tatou o mea tatau e faamaluluina ai lagona i mea ua mafatia ai, pe faalaeiau foi ina ia loto tele i taimi o faafitauli. Pe afai e fesootai lagona o le fatu solo ma lagi solo i le tulaga ua aafia ai le tagata.
O le saunoaga autu a le afioga i le Palemia le susuga ia Tuilaepa Aiono Sailele Malielegaoi na ia taua ai o le Punialavaa o se aufaipese ua lauilo ma iloga lana tautua i totonu o le atunuu aemaise o atunuu i fafo e ala i ana fatuga, o loo faapogai ai le susuga le faafeagaiga ia Rev Lale Peteru ma le faletua ia Vini faapea le nofoaalo.
Ua le gata i le malie o upu ae faapea foi le talafeagai lelei ma le agaga e faasino iai upu. Aua o pese uma lava ua iai feau taumolimoli i upu ua filifilia ai.
O le faamalosi a le palemia i le susuga i le faafeagaiga ma le faletua e faapea, Lale ma Vini aua e te lua faavaivai, e puupuu lava le taimi, aua o isi e le atoa le 70 tausaga na aumai e saili ai lo tatou manuia i le ola e faavavau. I le miliona ma miliona o tausaga, ao le tele o tatou na o le 70 tausaga o nisi foi na o le 50 tausaga e saili ai lou manuia i le lagi.
O le isi lea auala e mafai ai ona faasaoina le tele o autalavou ua tau au ina tatai ese atu i le malaia ae alu atu le feau i totonu o au pese o pese e fiafia iai le autalavou. Ia toe tusi nisi pese se tele e viia ai lo tatou matai sili.
O polokalame suifesiloi o le po na faaosofia ai lagona o le fiafia i tagata uma, aua ua toe fafagu mai fatuga tuai o le 70, 80, seia oo mai i fatuga faaonapo nei.
O toeaiina ma loomatutua ua toe faasolo mafaufauga i tua i tausaga tuai sa faalogologo ai i nei musika, aua ua toe usuina uma le tele o pese tuai ae faamatala e le susuga i le faafeagaiga le tausaga na tusia ai ma le mafuaaga na fatu ai le pese. O le po ua taunuu ai le upu a le atunuu, ta fia Falealili fua, aua ua militino tagata eseese i le matagofie o siufofoga malie o le Punialavaa.
O le afioga i le Palemia o Samoa faapea le afioga i le sui Palemia ia Fiame Naomi Mataafa ma nisi o faauluuluga o matagaluega o le malo o Samoa na malaga mamao mai lava e molimauina le faamoemoe o le Punialavaa. Na auai atu ai foi le afioga i le Konesula o Samoa ia Faolotoi Reupena Pogi, o le Minisita o tagata atu motu o le Pasifika ia Hon Aupito Su’a William Sio, o le tamaitai Minisita ia Jenny Salesa faapea susuga i faafeagaiga ma o latou faletua ma Samoa potopoto, ua mamalu ma maualuga ai lea po.
O le susuga ia Seumanu Fransis Ioane sa fai ma fofoga o le po, ao le susuga ia Leuga Ata Sofara na saunoa e faafeiloai aloaia le mamalu o le atunuu faapea malo faaaloalogia.
O le po fiafia lea po, o tagata matutua seia oo i tupulaga talavou e leai se tasi e lei faamalieina lana faalogologo ma lana matamata i le matautia o le faili a le Punialavaa, ua le gata i tagata sa auai ae oo foi i nisi o le atunuu sa maimoaina faafiafiaga i luga o le facebook a le radio Samoa lea sa faasalalau tu sao ai le faamanatuina o le iupeli auro a le Punialavaa.
E tasi le sui tuai a le faili sa malaga mai i lea po ma toe pepese faatasi ma le susuga i le faafeagaiga, o le susuga lea ia Tuala Vitale Petelo.
O le agaga faafetai o le susuga ia Rev Lale Peteru ma le faletua ia Vini faapea le nofoaalo, i le mamalu o le atunuu sa mafai ona faatasi atu i lea po ua maualuga ma matagofie ai le faamoemoe.
Momoli foi le faafetai i le afioga i le Palemia o Samoa ma le sui palemia faapea le konesula o Samoa i Aukilani, o afioga i Minisita o le malo o Niu Sila i le faaavanoaina o latou taimi e auai atu ai e molimauina le 50 tausaga.
Na faaleo foi le agaga faafetai ma le loto fiafia o le faili Punialavaa i nisi o kamupani ma faalapotopotoga sa latou lagolagoina le faamoemoe i lea po, e pei o le Radio Samoa ma le Samoa Times, o laei o le Punialavaa na tauaaoina lea e le kamupani o le Le Tasi, o le teuteuina o le maota na tapenaina lea e le House of Décor, sa faapea foi ona iai ma le tauau o le Samoa Air Ways, Taimalie Wesland and Ah Liki Samoa, o le asosi o le Scopa i Aukilani nei, o le ekalesia EFKS New Vision, Ane’ bake house and catering ma le kamupani o le Vailima i Samoa.
O le agaga maualalo o le auauna a le Atua ma lona faletua, a uma ona tatou faia o se galuega ona tatou fapea ifo lea o i tatou oni auauna le aoga ma le faatauvaa, ae faafoi ai le viiga i le Atua e ona le malosi uma lava.
O le lagona faafetai foi lea sa faaleoina i luga o le leitio i le taeao o le ASo Gafua mai le susuga i le faafegaiga ma le aufaipese o le Punialavaa e faafetai ai le mamalu o Samoa potopoto sa faatasi atu i lea po.
