Ole kamupani ale Yazaki Samoa ose tasi lea auaunaga e faitau fia selau tagata Samoa oloo faigaluega ai, ma ole kamupani foi lea na amata fofoa ma faavae mai ai le mafutaga lenei ole tatalo mo Isaraelu poo le Prayer for Israel Ministry.
Ose mafutaga na uluai faavaeina ele susuga ia Benyamin Lui Taala ile tausaga 1995 ma nisi ole au kerisiano i totonu ole Yazaki ina ia faia se bible study mo agaga e toatele oloo galulue ai.
Ile tausaga lava lea 1995 na tofia ai ele Atua le alo tamaitai ole afioga ia Polataivao Fosi Schmidt ia Maria Suitupe Schmidt e malaga i Isaraelu ile togalauapiga ole faleapitaga poo le Feast of Tabernacles ile aso 7 o Oketopa 1995, ma ole tausaga foi lea na ia uluai tutuina ai le moli mo le malo o Samoa i lea togalauapiga e suitulaga ai le fu‘a ole malo o Samoa e faailoa ai le lagolago o Samoa mo Isaraelu.
I totonu o lea faleapitaga na tuuina ai ele Atua ile loto o lea alo o Samoa ia Maria Suitupe Schmidt ua alagatatau loa ona faavae se mafutaga tatalo mo Isaraelu i totonu o Samoa, ae ole taimi lea ua amatamata ai le Bible Study i totonu ole Yazaki.
Ole faaiuga ole 1995 ia Tesema na toe foi ai Maria Suitupe i Samoa ma maua ai lona avanoa e faamalosi ai ile upu ale Atua i totonu o mafutaga Tusi Paia nei e 4 ile Yazaki, ma o iina foi na faailoa ai ele Atua i lona loto ua tatau loa ona faamaopoopo mafutaga nei i tua ole canteen ale Yazaki e amata ai le mafutaga lenei ole Prayer for Israel Ministry.
Ole aiga o Maria Schmidt o i latou ia oloo nafa ma le faia o meaai poo le canteen ile Yazaki mai le amatagaina ole kamupani seia oo mai lava ile taimi nei ma ole mafuaaga lea na maua ai se fesootaiga ma Bible Study nei e fā i totonu ole Yazaki.
Ile amataina ole galuega, na faailoa ai ele Atua ia Maria e tatau ona aoaoina nisi ole aufaigaluega se 30 i tulaga faataitai ona ole toatele ole kamupani. Sa faia le camp ile 30 aso mo le leadership teaching lea sa faaaogā mai ai nisi o failauga ile upu ale Atua i lea aoaoga.
E lē gata i lea, sa aoaoina ma faamalamalamaina ai foi le faaaliga (vision) mai le Isaia e 62:6-7 ma le Misiona (Mission) lea e maua mai ile Salamo 122:6-7 o lenei galuega. Ma o nei mau e lua ua fai lea ma taiala ma faavae mautu o lenei mafutaga ina ia malamalama le tagata ile mafuaga e ala ai ona tatalo mo Isaraelu. O lenei anavatau ma le manulauti ole tatalo mo Isaraelu na muamua aoaoina i totonu ole mafutaga a‘o lei oo ina faalautele atu i tua.
1996 na toe faia ai le togalauapiga ole faleapitaga i Isaraelu lea sa toe malaga ai Maria faatasi ma nisi o sui ole mafutaga le susuga ia Seko, o Donna ma Mativa.
1997 na sui ai foi nisi na malaga ai i lea lava togalauapiga ole faleapitaga, lea sa toe auai atu ai Maria, o Benyamin Lui Taala, Timoteo ma Ruta.
1998 na valaauina ai loa ele Atua Maria Suitupe e galue faamisionare i totonu o Isaraelu ile Jerusalem House of Prayer mo atunuu uma ole lalolagi, ae ole taimi lea ua filifili ai loa le susuga ia Benyamin na te tauavaeina le taitaiina ole galuega i Samoa.
1999 ile masina o Aperila na toe taliu ai Maria i Samoa ma toe faaauau le taitaiina ole galuega ole Prayer for Israel Ministry.
2000 na tuufaatasia ai loa Benyamin Lui Taala ma Maria Suitupe Schmidt ele Atua e ala ile sauniga ole faaipoipoga ma tutū faatasi ai loa e taitai le galuega seia oo mai ile taimi nei.
Saunoa Maria o lenei galuega ose galuega toatele ma ua faapea foi ona tupu ma ola ona ole taitaiga ale Agaga Paia.
Na faavaeina ele Atua, ma e lei faigofie lona amataina, ae e mafaia mea uma ona o Iesu Keriso, ma ole finagalo foi lea ole Atua mo Samoa e tatau ona tatalo mo Isaraelu, ma ia aua foi ne‘i misi Samoa i ana faamanuiaga ile tatalo mo lona nuu.
Na amata le mafutaga ile Yazaki, ona faasolosolo ane lea i mafutaga tatalo i Mulinuu pe a uma le mafutaga ale YFC i luma ole maota ole malo i Aso Faraile taitasi, ona see lea iluga ole fale tatalo ale malo i Vaea, faasolo ane ai ile maota o Polataivao Fosi i Alamagoto.
2003 ia Tesema na malaga mai ai Benyamin Lui Taala ma Maria ma le fanau i Niu Sila, ae tuua ai le galuega i nisi ole mafutaga ua agavaa ma faatuatuaina e tauaveina le atolaau ale Atua i Samoa.
2004 na toe amataina ai le galuega lava lenei i totonu o Aukilani seia oo mai ile taimi nei, ma o lenei mafutaga, o soo se tagata lotu lava oloo mafai ona auai ma ofoina lona soifua e tatalo ai mo le nuu ole Atua.
Ole aso 27 o Tesema 2016 na faamanatuina ai loa le 20 tausaga talu ona faavaeina mai lenei mafutaga i Samoa ma Niu Sila nei, ma sa faia lea ile Mangere Central Hall i Magele.
O susuga i faafeagiaga mai ekalesia eseese ma o latou faletua faapea uo ma ē masani faatasi ai ma sui ole YFC mai Samoa sa latou molimauina lea afiafi tāua ua faia ele Atua e olioli ma fiafia ai lana fanau ona o nei tausaga e tele ua ausia ele mafutaga e faataunuuina ai le Faaaliga ma le Misiona mo lona nuu.
Ole susuga lava ile taitai ia Ben ma Maria sa taitaiina le polokalame ole aso ae ole tofa ia Pitoamoa Pesi na faia le upu faafetai ile paia ole aufaigaluega ale Atua sa auai faapea le mamalu ole auvalaaulia.
Ua feofoofotai lagona ole fiafia ma le olioli ile Alii ina ua tutū faatasi tagata mai ekalesia eseese e molimauina le galue ole Agaga Paia e faailoa ma faalautele le feau momoli ma le anavatau ole Prayer for Israel Ministry, ma ua a‘e ai foi se manatu i susuga i faafeagaiga sa auai i lea afiafi, ole a latou lagolagoina lenei mafutaga ina ia faasafua mai ai manuia ole Atua mo tagata uma o Samoa.
Ma ole toatele foi o tagata sa auai i lenei mafutaga o lea ua filifilia ele Atua e avea ma faifeau i nisi o ekalesia, ma ole talalelei lea mo tagata uma o Samoa.
