Pale Nora Aloiai ile Miss Samoa Victoria 2018

O le sausaunoaga faa-Samoa a le Tausala o Vitoria ina ua mae’a ona faapaleina
O le sausaunoaga faa-Samoa a le Tausala o Vitoria ina ua mae’a ona faapaleina

O le lalelei o le meaalofa mai le Atua, e ao fo’i la ona faafoi le viiga ma le faaneetaga i le Atua ona o le faamoemoe ua taunuu o le laau lea o le soifua.

O le afiafi o le Aso Toonai na tuanai atu, na matua faatumulia ai le Town Hall a le pitonuu tu matafaga o Williamstown i le aai o Melepone, i le mamalu eseese o le nofo a faafeagaiga i ekalesia e fia, tainane tupu ma tapaau, tulatoa ma aiga se ia oo lava i uo ma aumeamamae aemaise o tau aiga o tamaitai e to’a ono sa tauva ile Miss Samoa Victoria 2018

O le  taupati atu ina ia molimauina le faamoemoe sa fau ao fau po pe tua mani a. O le fofoga o le po o le tamaitai sa avea ma lalelei o Vitoria I le 2000, o Gina Tafea ma le alii o Fulisia Asalemo Tofete, na mua’i sii le faafetai i le Atua i le talosaga na saunia e le sususga i le toeaina o le EFKS Aviti Etuale.

Na saunoa le afioga ia Lemalu Faatau o le sui o le komiti e faafeiloai le afifio atu o le atunuu tainane le vasega o faamasino ona amata faasolo ai lea o vaega eseese na vaevae i ai le tauvaga.

E maeu le lalelei o tamaitai tauva i a latou teuga eseese sa faatino ai o latou faiva alofilima pei ona faa autu i ai le tauvaga, “O faiva alofi i lima o tamaitai.”

E mamafa taumafataga a’o faagasolo taleni a tamaitai lalelei, aemaise o le malie o tifiga a le tamaitai faafiafia ia Tara Ninja Apa mai le aai o Sini, faapea foi le sao matagofie a le Neshian Pearl ma le Tama tatau.

  Na matauina le lagolago malosi a aiga ma uo a tamaitai tauva, ina ua vavae foi foe ae maua le avanoa o le au tapuai i luga o le foloa, na matua silamio Samoa ae alo tau aiga i a latou foi taleni faafiafia ma le siva. I si’ui o le faamoemoe na patipatia ai nisi o kamupani sa lagolago malosi, ma molimauina ai le titi faitama o aiga ma matua, ina ua amata fofogaina suafa o tamaiatai tauva na faamanuiaina i taleni taitasi, aemaise lava le taimi na tolaulauina ai le tulaga tolu, lua ma le manumalo.

O le iuga la o le tausinioga i lenei tausaga mo se Tausala Lalelei o Melepone Vitoria, ua tulaga tolu ai le tamaitai lalelei ia Rona Sina Komiti Alainuuese sa lagolagoina e le Leneta Care services, tulaga lua le tamaitai ia Karen Ario Sooaemalelagi Sinafoa o le tausala a le Coburg Uniting Church, ae ua faapaleina nei ma avea ma Tausala Lalelei o Melepone Vitoria mo le tausaga 2018, le tamaitai o Nora Li’o Setu Aloiai sa lagolagoina e le Tausala Manaia mai afioaga o Fogapoa, Taga, Vailoa i Palauli ma Sapapalii. Ua sauni atu nei la le tamaitai o Nora mo le tauvaga o le Miss Samoa i le taimi o le Teuila i Samoa. O outou mama na.