E lei taumateina lava le tamaitai e manumalo ile tauavaga ole Miss Samoa o lenei tausaga, e pei ona faaiu iai faigamea ole faamanatuina ole Teuila 2017. Na amata lava ona faia le faaiuga ale toatele, na maimoaina taualumaga o lenei faamoemoe mai le amataga, a’o lei oo ile po ole Aso Toonai na tea nei.
E oo ane ile taimi ole tauvaga na faasalalau ai ele TV3 i lea afiafi, ma faamaonia ai ele toatele ole atunuu i nuu i tua ma Savaii, e lei saofia mai e maimoaina le tauvaga i Tuanaimato, le tulaga ese mai lava ole tausala manumalo, le tamaitai o Alexandra Isaako Iakopo.
Ole tamaitai manumalo, e mai Savaii ua 23 ai lenei o ona tausaga mai Fusi, Sapalii ma Moamoa. Ua faaiuina ai foi ma le tautua ale tausala ole tausaga ua mae’a le tamaitai o Pricilla Olano, na galue ai ile taimi o lana nofoaiga ile pulega o Tulisi ma le Malo.
Ile silamio ale atunuu, na atagia ai le fulisia o finagalo faaalia o tagata maimoa, ile tamaitai tauva ale House of Gold. Lea na o latou faamalosiau ile faamoemoe e pei ona tuuina atu iai le latou sui, lea na ia talanoa ile aufaasalalau, sa leai sona manatu e agavaa ile tauvaga, peitai o lea ua tino mai le sa’o o lana House of Gold, ma ose faafetai lea ile Atua, ile tali mai i ana tatalo mo le faamalosiau lea ua pale mai ai.
Ua ia folafola foi le faatinoina o lana galuega, ile tonu ma le lelei mo Samoa. Ma ia faafetai faalauaitele ai ia Samoa ile lagolagoina o ia, ma ose luitau tele foi lea mo ia, ua lagona ai lava lona loto maulalo ma le faafetai tele. O lana taleni mataina lea na tele ina maofa ai le aumaimoa, ile vaega mulimuli na ia faatino ai le siva a Michael Jackson, ae agai uma lava ile auga ole faamoemoe o Samoa Matalasi.
E oo foi ile faatalanoaga, le interview, ole vaega lea ole tauvaga sa tele ina faaletonu tali a tamaitai tauva, peitai na tu matila mai lava foi le tali malamalama a Alexandra, ma tulaga ese mai ai lava lana ia taleni mai le toaiva o tamaitai tauva.
O lagona ole fiafia ma lagona o faamanuiaga na laualuga ile tausala fou o Samoa, lea na lagolagoina malosi ele faleaiga ole McDonald i lenei tausaga. O Alexandra e pito ile uii ole fanau e toalima a ona mātua, na aoga lava i Samoa ma faauu mai Amerika, ma ona faailoga maualuluga.
Na auai atu iai taitai ole malo, mai le Ao ole Malo ma le Masiofo, ole Palemia ma le auvalaaulia. Ile saunoaga aloaia ale Palemia, Tuilaepa Lupesoliai Sailele Malielegaoi e tatala aloaia ai le tauvaga, na ia faailoa ai foi le tulaga ese mai ai lava ole Teuila o lenei foi tausaga, ile lagolago ale atunuu, ma le malo, lea ua faaiuina ai foi le fono a taitai o malo ole Pasefika na usu mai ile tatou atunuu.
Ua faaiuina foi le vaiaso ole teuila ile tauvaga e pei ona faia, ma momoli ai le faamalo ma le faafetai tele ale Alii Palemia. Ua molimauina le maeu ma le matagofie o faaaliga, e pei ona molimauina i lea po.
Ole taimi masani lava lea i tausaga uma e faatasia ai o tatou tagata e faataunuu le Teuila, ma taualuga ile sailia lea ose Tausala. Auā ua avea lava le tauvaga o Tausala ma se vaega ole polokalame ole Teuila e taa’ina iai le toatele. Ose faataitaiga lelei mo augatupulaga, e unaia ma faaolaola ai a tatou agaifanua aemaise ole atinaeina ai ole itupa o tamaitai, ma le latou foi pitolaau ile atinaeina o Samoa.
Ua faaauau ai pea i lenei foi tausaga le faapaaga ale malo ma faalapotopotoga tuma’oti e ala ile Tausala Samoa e pei ona gapatia ai ma le SEI (Samoa Events Incorporated).
Ole tamaitai manumalo, ua avea ai nei o ia ma avefu’a a Samoa, ma ole a avea ai foi o ia ose tamaitai mitamita mo lona atunuu, ole a avea foi ma sui o Samoa i ni fono tetele e faia e le gata mo le faalauiloaina o Samoa i Samoa, ae o fafo atu.
Ae ole a avea ai foi o ia ma sui o Samoa e tauva mo le sailia ose tamaitai lalelei ole Pasefika ile tauvaga e faia i Fiti ile faaiuga ole tausaga nei.
Ole sini o lenei tausaga, o Samoa lalelei, ua saga matagofie ai lava Samoa. Na ia faamanuia foi ile tamaitai o Pricilla Olano ua faaseetuagalu ina ua maua lona sui, mo le galuega na feagai ai ma ia ile tausaga ua tuanai.
O tamaitai tauva e toaiva e aofia ai Fasi Faitafa Talimatasi Liolevave mai Ausetalia, NSW, na manumalo ile Best Sarong.
Ole tamaitai o Adele Faaosofia mai Victoria Ausetalia na manumalo ile ofu laulaau, ma le Puletasi matagofie, le tamaitai tauva ale E.M.D. (Events Marketing and Distribution) o Karameli Oriana Schuster na manumalo ile ata lelei ma le toatele o tagata na palota iai i luga ole internet (Miss Internet), ae o isi faailoga na tauva iai tamaitai e pei ole faatalanoaga, (Interview), ole taleni mataina ma le ituaiga o tamaitai (Miss Personality), na maua uma lea ele tamaitai ua manumalo, ia Alexandra Iakopo. Ole sola ai o Savaii ma le manumalo ole tausala o lenei tausaga, ae tulaga lua le tamaitai lalelei mai NSW Ausetalia ia Fasi Faitafa Talimatasi Liolevave, tulaga tolu le isi tamaitai Samoa mai Ausetalia i Vitoria, ia Adele Faaosofia, tulaga fā le sui tauva ale ae tulaga lima ai le tamaitai mai Niu Sila, Natalie Leitulagi Toevai.
Iuga ole Tauvaga Miss Samoa 2017 – 2018
Miss Personality – Miss House of Gold
Miss Photogenic – Miss EMD
Miss Internet – Miss EMD
Miss National Tourism – Miss Original Style
Miss Best in Sarong – Miss Samoa NSW
Miss Best in Traditionally Inspired Wear – Miss Samoa Victoria Inc
Miss Best in Puletasi – Miss Samoa Victoria Inc
Miss Best Interview – Miss House of Gold
Miss Best in Talent – Miss House of Gold
Miss Samoa 4th Runner Up – Miss Samoa NZ
Miss Samoa 3rd Runner Up – Miss TAPZ Fashion & Design
Miss Samoa 2nd Runner Up – Miss Samoa Victoria Inc.
Miss Samoa 1st Runner Up – Miss Samoa NSW
Winner – Miss Samoa 2017-2018 – Miss House of Gold
