Pale le teine o le Vaimauga i le Tausala o Samoa

Ua na o loimata lava o le fiafia na vaaia i le tamaitai o Susan Fanueli ina ua manumalo i le Tausala o Samoa i le faaiu ai o le vaiaso o le Teuila.
O lana faafetai ona o lea ua pale mai ma ua tali mai le tele o vaiaso ma masina o sauniuniga ina ua faamautu i lona mafaufau e tausinio i lenei tauvaga tele o le saili ai o le lalelei o Samoa poo le lalelei foi o le Teuila.
O le tamaitai lenei e galue i le Ofisa o Suetusi a le Malo i le Maota o le Malo i le Eleele Fou. Ua iu mai ana aoaoga faaiunivesite i Niu Sila ma o se tamaitai o loo galue i le Malo.
O le tamaitai o Susan o ia o se tasi o tamaitai e to’avalu (8) na tausinio e saili ai se tausala o le Teuila i lenei tausaga. E toatasi lava le sui tauva mai i fafo i lenei tausaga, o ia lea o Muliagatele Renera Thompson lea na tulaga lua (first runner up).
O le vaevaega o le tauvaga na aofia ai polokalame na faatautaia i le lua vaiaso na faagasolo ai asiasiga ma faatalatalanoaga a tamaitai atoa ai faailoga faapitoa o le po o le tausinioga.
Sa faatautaia le palota i le tamaitai ata lelei e palota ai soo se tasi i luga o le internet poo le computer ma o palota ia na manumalo ai le tamaitai ua pale nei i lea tauvaga. O le tauvaga i le taleni na maua foi e Fanueli ma o le aotelega lava o le tauvaga atoa na manino e maualuga lava ‘ai o lenei tamaitai na maua.
O le tamaitai lenei e sau mai i Toomatagi ma le afioaga o Vaivase ma o ia o le lona lua o le auuso lenei ua tausinio i le tauvaga e saili ai se lalelei o Samoa.
O le tausaga muamua lenei ua ave ai e le Pulega o Tagata Tafafao Maimoa mai i Fafo le faatautaiga o le faaaliga tausala i le Manaia Events latou te faatautaia, ma e maeu foi le tele o polokalame na agai i ai tamaitai latou te faatautaia ma le faamoemoe ina ia tele le avanoa e feiloai ai le atunuu i nei tamaitai ma fai mai foi so latou finagalo i le filifiliga o le tausala o le Teuila.
O le tausala o le tausaga ua tuanai atu o Janine Tuivaiti na tapunia le po i lana faamavaega ma le faafetai i le avanoa ua faapea ona maua e fai ai ma sui o Samoa i lenei tofi maualuga ma na manino le telē o le aogā o lenei tofi i lenei tamaitai auā e faamautu lava o ia i Niu Sila ae o lona galue ai i Samoa ma avea ma tausala o le atunuu na laasia ai foi le isi tulaga maualuga o le manumalo ai i le tausala o le Pasefika, lea foi e faatali le suiga o lenei tausaga ia Novema.
Mo le tamaitai o Susan Fanueli, ona pau lava lana faafetai o le maua o le avanoa e tulai mai ai o se tausala o le atunuu ma na ia ta‘ua, o le a taumafai i le maualuga e gata ai ina ia fai ma sui o Samoa i soo se galuega e tofia ai o ia e le Pulega o Tagata Tafafao mai i le tausaga atoa o le a galue ai i le faalauiloaina o Samoa.