P.G.C. C.E.O. Andrew Minogue, Peresitene, Vidhya Lakhan ma le Peresitene ale S.A.S.N.O.C. Fepuleai Patrick Fepuleai - Photo: Samoa Observer

P.G.C. C.E.O. Andrew Minogue, Peresitene, Vidhya Lakhan ma le Peresitene ale S.A.S.N.O.C. Fepuleai Patrick Fepuleai – Photo: Samoa Observer

Ose tala fiafia lea ile atunuu ina ua manumalo ile tauofoga ma Tahiti ma Guam e talimalo ai Samoa i taaloga ole Pasefika ile 2019.

O lenei faaiuga na faalele ile Aso Faraile na tea nei ele Pacific Games Council ma lana faaupuga, “Ua tasi ia Samoa le faaiuga ale P.G.C. e tuu ia Samoa le avanoa e talimalo ai ile Asosi ale Pacific Games a Samoa i Taaloga ale Pasefika ole 2019.”

Na faafetaia foi ele Fono le fesoasoani ale Palemia o Samoa ma le Malo ile lagolagoina malosi ole ofo a Samoa. Ole mafuaaga ole see ai o lenei faamanuiaga mo Samoa ona ole faafiti ai lea o Toga e faataunuu lona tiute e talimalo ile Pacific Games e pei ona fuafuaina. Na faamaamulu le Palemia o lea atunuu Akilisi Pohiva mai le taligamalo, ona ole faigata ole faatupeina ole faamoemoe.

Na fai ai loa le tauofoga ile va o Samoa, Tahiti ma Guam mo se atunuu e talimalo ile 2019. Ae na muamua faamavae Tahiti mai lea tauvaga ae tuu le avanoa ia Guam ma Samoa.

Peitai ole iai o Guam ile lio o sauaga a Korea i Matu, ua tasi ai le Fono e tuu ia Samoa le taaloga. Ile taimi nei oloo faatalitali lava Guam ise osofaiga faafuasei a Korea i Matu, aua ole olo puipui lea a Amerika ile Pasefika.

Na ta’ua ele Fono, na vave iloa lava le lē amanaia e Tahiti o lana ofo e talimalo ile Pacific Games. Na asiasi i Tahiti sui ole Fono, ma vave iloa ai e na’o upu le latou ofo ae e le o tu malosi le Malo o Tahiti e lagolago le ofo ale Asosi P.G.C. ale atunuu. E faapena foi ia Guam, ae na’o Samoa lava na tausinio e tali atu i manaoga uma ole Fono mo taaloga.

Na ta’ua foi ele Fono, na iai ile ofo a Guam le pasia ole tulafono e lana Palemene e faatupe ai le fausia vave o nofoaga mo Taaloga. Ae ole pasia o lea matupu e tuai lava ona faatinoina aua e leo iai se ioega ale Kovana ole Teritori ma le Fono Aoao ole atunuu e faatupeina le faamoemoe i lalo o tupe o lenei tausaga faaletupe. Ua momoli ai le faafetai ale Fono tele ale P.G.C. ia Tahiti ma Guam ile faaalia o manaoga e talimalo ile 2019. “E faafetai ele P.G.C. ia Asosi P.G.A. a Guam ma Tahiti ile tali manao e talimalo ile 2019,” saunoaga lea ale Peresitene Vidhya Lakhan.

O ia foi lea na ia faalele le tala fiafia o lea talimalo Samoa. “O Samoa ua masani ile fai mea mafai e faatinoina taaloga faapenei e pei ona talimalo ai o ia ile 2007, ma le 2015 ile Youth Commonwealth Games. E matua leai ma se tulaga taumate ile Fono Aoao ole P.G.C ia Samoa ma lona mafai e faatino le Taaloga tele ole 2019. Oloo mautu fale taalo uma a Samoa i lalo ole vaaiga ale Malo ma le Palemia. Ua fiafia ai le P.G.C e filifilia Samoa mo Taaloga ole 2019.”

Ole saunoaga lea ale Peresitene ile Aso Faraile ua tea nei, ma ua maua ai e Samoa le avanoa e talimalo ai mo le Pacific Games ile 2019.

Comments

comments