O le ripoti a le Faletupe Tutotonu a le Atunuuu mo le kuata faaiu o le 2017, Setema ia Tesema ua faailoa ai ua ova ma le piliona tala Samoa le aitalafu a Samoa i atunuu i fafo.

O le aofaiga e $1.1 piliona le aofaiga atoa o le aitalafu, ae o le ‘afa o lena aitalafu o tupe nono mai Saina lea e tusa ma le $416 miliona. E sili atu le aitalafu a Samoa ia Saina, nai lo le tuufaatasiga o aitalafu a Samoa i le Asian Development Bank, World Bank ma Iapani. O le masina o Ianuari na teena ai e le palemia lipoti e faapea, ua ova ma le piliona tala le aitalafu a Samoa ia Saina.

I le tala o le tupe ua faaalia ai e lē tumau le aitalafu a Samoa ia Saina, e fesuiai i taimi uma. I le 2015 e $441 miliona le aitalafu ia Saina na pa’u i le $408 miliona i le 2016 ae ua toe alu i luga i le $416 miliona i le 2017. E faaopoopo lea i isi aitalafu e iai le $89 miliona na nono mai ia Iapani, ma le $400 miliona mai le Asian Development Bank.

O le aofaiga atoa o le aitalafu a le Malo na faaopoopo i le $6.8 miliona poo le 0.6% i le 2017 pe a faatusa ia Tesema 2016.

I le tala o le tupe na ta’ua ai foi le aofaiga o aitalafu a tagata o le atunuu (Domestic Debts) i le kuata lava lea faaiu ia Tesema 2017, o le aofaiga e $24.4 miliona tala. Ae sa pa’u i le $9.6 miliona (poo le 28%) mai le taimi lava e tasi i le 2016.

I lea lava ripoti o loo ta’ua ai e le Palemia, Tuilaepa Aiono Dr. Sailele Malielegaoi e leai se tulaga e popole ai le atunuu i nei nonoga tupe. I le talitonuga o le Palemia, o loo paleni mea uma, o le tupe e maua mai ma tupe ua faatino ai atina’e mo le lumanai.

Na ia ta’ua foi o loo iai le polokalame a le malo e faaitiitia ai aitalafu (Debt Management Policy) o loo mulimuli iai ma faatonu ai galuega faaletupe a le Malo. E vaai taulai foi le Malo ma le Kapetena i le malosiaga ma le mafai e le atunuu ona faasoa lana seleni.

O le mafuaaga lea e leai se tulaga e popole ai auā o aitalafu lea ua iai $1.1 piliona ua uma ona faitauina i le mafai o Samoa e totogi ma faasoa.

Fai mai le Palemia e malosi tele le totogi aitalafu a le Malo i tausaga uma. O le tele o poloketi o loo faatupeina i nonoga tupe, e maua lava seleni e totogi ai ae e lei mae’a nei poloketi. O loo faatulaga uma tupe nei i le faitau a le malo, e lē o iai se mea o misi.

Fai mai le Palemia e lē o malamalama le atunuu i le faavasegaina o aitalafu nei. O loo faapolokalameina le totogiina o aitalafu e ta’i 5 tausaga isi nonoga tupe, 10 tausaga ma le 20 tausaga.

I le nofo aitalafu ai o Samoa ia Saina o loo televave atu le totogi a le Malo i le taimi (timeline) o aitalafu na malilie iai atunuu e lua. 

E le na’o Saina ae faapea foi ma nonoga tupe mai le ADB ma Iapani.

O galuega tetele a le Malo o loo faatali nei e aofia ai le faalauteleina o le auala mai Vaitele i Faleula ma le toe fausia o le auala agai atu i luga i Vailima. O ia poloketi ua mae’a ona pasia, ua mae’a foi ona faataatia ese tupe o ia galuega tetele mai nonoga tupe o loo totogi i le taimi nei.

Comments

comments