O le ata tifaga o loo faaali pea e oo mai le taimi nei, aemaise i Ausetalia lea ua oo atu i ai le faasologa, le Three Wise Cousins, o se ata na pueina le tele o ona vaega i Samoa, e ui e iai nisi vaega sa pue i Niu Sila.
O le ata i se alii talavou, na avea lona fia mafuta i se tamaitai lalelei, ae o lea tamaitai e fia uo i se tama e ola a‘e ma iloa le olaga moni faaatumotu, o lea na naunau ai lenei alii se‘i alu i lona atunuu moni, i Samoa, ina ia mafai ona faataitai i le olaga moni o se alii Samoa, ia iloa ona fai uma feau ma galuega a se alii Samoa.
O lana malaga lea na agai ai i nisi o ona tausoga, le aualii o Tavita ma Mose mo se la fesoasoani i le tau faasinoina o le olaga moni o se tama Samoa i si o la tausoga atu i Niu Sila, le alii o Adam.
O le itu malie i lenei ata, o le matuā ese o le olaga ua tofo nei i ai Adam ma ua amata ona ia iloa le faigata o le olaga, ae sa taumafai pea ona o lona faanaunauga ia maua le tamaitai lalelei.
O se ata sa faatino i se auala faamālie, e ui o loo afifi mai ai se aoaoga sili ona tāua mo tupulaga talavou ma fanau a Samoa ua ola a‘e i nei atunuu ma leai so latou malamalamaga tele i le faigata o le olaga i Samoa, ae o le faaiuga o le ata, ua lē gata e foliga mai ua maua le auga tonu o le faanaunau o Adam, ae ua suia atoa ai foi lana vaai i le olaga, ua iai le lagona talisapaia o le olaga aemaise faataulaga e tele o loo faia e mātua auā se lumanai manuia o fanau.
E mataina lenei ata, auā sa manatu le alii na faia le ata, atonu o le a na o Samoa lava lana aumaimoa, peitai na vaaia ua lolofi atu ai ma papalagi ma tagata o isi atunuu. Atonu o latou o le malie sa tulituli ai le ata, ae o le toatele o tagata Samoa, e pei ua toe faamanatu mai ai ia i latou le olaga sa amata mai ai a o lei omai i nei atunuu. Ina ua fesiligia le susuga Stallone i ni fesootaiga i le imeli, pe aiseā na manao ai e fai sana ata tifaga, ae pe na iai foi se mea poo nisi na uunaia o ia e fai lenei ata tifaga, na ia saunoa, pau lava lona faanaunauga na iai, ia mafai ona ia faia se ata tifaga o le a matamata tagata ma fiafia ai, ma ia avea o se ata e manatua pea i le manaia.
Na ta‘ua e Stallone, o nai ona mātua lava le uunaiga sili o ana taumafaiga e pei foi ona iai lenei galuega tele i le faiga o le ata. O le tele o vaega o loo faatino mai lenei ata, o lagona na totogo ane i lona mafaufau a o toe mafaufau i mea sa a‘oa‘oina ai o ia e ona mātua i le olaga, lea ua faigofie ona maua ai manatu e fafau ai le ata.
Na fesiligia foi Stallone i le auala na ia filifilia ai tagata e faatinoina vaega eseese o le ata, poo ā ni uiga poo aga a tagata sa manao e faaaogā, aemaise lava i alii e toatolu ia sa pei e faaautu i ai le tala atoa o le ata.
Ta‘ua e Stallone, o le uiga autu lava sa saili i ai tagata mo le ata, o i latou e iai le faanaunauga moni e fia galulue ma faatino lelei vaega o le a tofia i ai. O le pueina o se ata tifaga e tele lava manaoga e tulai mai ai nisi o taimi, aemaise foi pe afai e tuli se taimi ua faatulaga e tatau ona pue ma faamae‘a lelei ai se vaega, e manaomia ai lava ona lototasi uma tagata ina ia ausia na manaoga.
Ma sa tatau ai i tagata uma o le ata, ona iai uiga e mataala, e tinou e pue lelei le manaoga o loo faailoa e tatau ona faatino ai se vaega, ma ia avea o nisi e mafai ona faatino pea i se tulaga lelei a latou vaega, i soo se taimi ma i lalo o soo se tulaga pe solo solo mālie pe i ni tulaga vevesi.
Na mafai ona filifilia e le alii e ona le ata, alii talavou e toatolu ia sa autu i ai le ata, o Neil Amituanai, Fesui Viliamu, ma Vito Vito, ona sa latou feiloai i le taimi na auai nei alii o Fesui ma Vito i se tasi o polokalame a le Fresh TV, lea sa iai le sailiga o se alii lalelei poo le Mr Lavalava.Fai mai Stallone, o ina na ia matauina ai nei alii, e lē gata o ni alii e uai lelei atu ma naunau e faatino lelei ni a la galuega poo vaega e tofia ai, ae o ni alii foi e lalelei i o la foliga vaaia ma le auala e amioai.
I nisi foi o faatalanoaga a nisi o leitio faasalalau i Niu Sila nei ma le alii fai ata tifaga, na matuā tautino ai nei tagata faasalalau i le maoae ua oo i ai taumafaiga a lenei foi alo o Samoa ae tainane se alo o le Pasefika ma lana ata tifaga.
O le mea moni e pei ona ta‘ua e Stallone, ina ua sauni le ata mo le faaalia i totonu o se fale tifaga, sa iai lava lona lagona se‘i tau ina amata i se fale tifaga se tasi i Aukilani, auā atonu pe na o tagata Samoa lava o le a fia o atu e matamata ai.
Peitai na matuā tulaga ese le iuga na oo i ai, e pei o lea ua toetoe lava o fale tifaga uma i Aukilani, ma faasolo atu i Ausetalia, lea ua matuā tulituliloa ai e tagata lenei ata.
O le matautia o le alumia o lenei ata, ona ua mafai ona pasia e le Three Wise Cousins le alumia o le ata tifaga lauiloa o le Star Wars lea sa matuā tulaga muamua le alumia i Niu Sila, peitai ina ua amata faaali le Three Wise Cousins, na iu ina maualuga atu le alumia o le ata a tamaiti faipopo ma ua tele atu foi le seleni ua maua ai, nai lo le alumia ma le tupe na aoina i le faaaliga o le ata tifaga, le Star Wars.
O lenei ata tifaga na amata pueina i le masina o Oketopa i le 2014, ma e lei iai se vaega tupe tele faapea na faatulaga ese auā lenei faamoemoe, e lē pei o ata tifaga uma ua lauiloa nei, e toetoe paia pe sili atu foi ma le miliona e tapena ai.
Ae o le ata a tamaiti faipopo, e leai se tupe faagaga, tasi le mea pueata, leai ni faasologa pepa uumi o sikulipi e tau a‘o le faitauga, ae sau sa‘o lava i le loto manatu ma aga faaalia, ua atili ai ona matuā moni ma faaootia loto le maimoa atu i lenei ata.
Ta‘ua e Stallone, o lenei tomai o le fai ata tifaga e lei matuā toatele naua fanau Pasefika ua latou faia, ae afai o se mea e te naunau e fai, aisea e lē matuā tuu atoa loa i ai lou mafaufau ma ou tomai ae taumafai ia tino mai lena moemitiga.
Fai mai Stallone, aua e te fefe pe vave sisii ou lima pe a tele ni mea sese e te faia a o faagasolo sau galuega faapea.
O au mea sese, o lou faleaoga lena e toe fotuai ai nisi manatu lelei ma toe aotauina ai nisi tomai e sili atu ina ia tau lau o lou faamoemoe ma tino mai se galuega lelei i lona atoaga silisili.
