“Ou te lē foi i le faaiuga ua faia ia te a‘u”…Lilomaiava Fou Taioalo

Ua faateia le afioga Lilomaiava Fou Taioalo i le salalau ai o lipoti i le faaiuga o lena vaiaso ua mavae i le faamuta o lona toe avea ma Komesina o le Matagaluega o Leoleo ma Falepuipui, ae leai se faaaliga poo se iuga tusitusia mai le Kapeneta e logo atu ai lea faaiuga.

O le fesiligia ai e le autusitala o le afioga i le Palemia susuga Tuilaepa Lupesoliai Sailele Malielegaoi i se faaiuga o le komesina, na tali ai Tuilaepa ua faamalolo, ma ua atoa le vaiaso talu ona faia lea faaiuga.

“Ou te lē foi i le faaiuga ua faia ia te au, ma o le a ou fight lava seia oo i le faamasinoga,” o se finagalo lea o Lilomaiava Fou ina ua valaau i ai i lana telefoni feaveai, ina ua faailoa faalauaitele i lipoti le faaiuga ua taunuu i ai le Kapeneta. “Ou te ofo a‘u i lenei faaiuga, aemaise o lea e leai ma se faaaliga poo se tusi ua logo mai ai a‘u”.

O le faaiuga a le Kapeneta e faamuta le tautua a Lilomaiava Fou Taioalo mai le toe avea ma Komesina o leoleo e faavae mai i le fautuaga a le komisi suesue na silasila pe iai ni aafiaga o tiute faaleoleo o le Komesina ona o suesuega a se isi komisi i tuua‘iga o pulega lē lelei ma faiga piopio i le falepuipui i Tafaigata.

O le suesuega muamua a se komisi na tuuina atu ai se lipoti i le Kapeneta na faailoa ai auala ma fautuaga e fofo ai faaletonu ina ia lē toe aliali mai, aemaise o le faatinoga o le pulea o le falepuipui i lalo o le matagaluega o leoleo, e pei ona silafia o le amataga o le tausaga fou e tuu eseese ai le pulea o falepuipui i le atunuu e le toe i lalo o le matagaluega o leoleo.

I le taimi nei ua faaalia e Lilomaiava Fou o le a silasila i le faaiuga ua faia ia te ia pe a taunuu atu ona iloa ai lea o se isi laasaga o le a oo i ai le mataupu. O le lē talia e lē sa avea ma Komesina o leoleo o le faaiuga ua faia ia te ia, o le tutumau pea lea o lona talitonuga e leai se mea na faaletonu i lona taitaiga o le pulega o le matagaluega mo le silia i le fā tausaga.

O le lua a‘i o ana konekarate tai tolu tausaga i le tofiga ua faamalolo ai, ae o loo totoe tausaga e lua o lana konekarate lona lua. O le tasi o tamalii le afioga Salā Seaga Uili Lafaele sa pulea le falepuipui i Tafaigata i lona tulaga o se tasi o komesina lagolago, na faamavae ina ua tuu i ai le avanoa e le komisi suesue e aofia ai ma le Komesina e filifili i le faamavae poo le tali atu i suesuega a le komisi.

Ua silia i le fāsefulu tausaga o lana tautua i le Matagaluega o leoleo ma falepuipui. Sa avea o se tasi o Komesina lagolago i le nofoaiga a le susuga Papalii Lorenese Neru i le tofiga komesina o leoleo, seia oo ina lē toe filifilia lea tamalii ae tulai mai ai loa e avea ma Komesina o le matagaluega, lea ua faamalolo nei lona tofiga ona o suesuega sa gafa ma le komiosi suesue na filifilia e le Malo sa taitaifono ai le Komesina o Sulufaiga le afioga Maiava Iulai Toma.
O sui o lea komisi e aofia ai le faletua o Tili Afamasaga ma le susuga Su‘a Tanielu.
Le afioga Lilomaiava Fou Taioalo, sa avea ma Komesina o le Matagaluega o Leoleo ma Falepuipui, ua faamalolo ma faamuta ona tiute i se faaiuga a le Kapeneta e faavae i se fautuaga mai le Komisi suesue sa silasila i aafiaga o tiute faaleoleo o le Komesina