Osofaia Turisi i le fale laau

O lea ua suesueina e le ofisa o leoleo i lenei vaiaso se lipoti o se ulugalii papalagi na tafafao i se tasi o mataaga i Tiavi na faapea ona osofaia i le Aso Sa na se‘i mavae atu nei.

O lenei ulugalii na ta‘ua e lipoti a leoleo na asiasi mai i Samoa mai i Ausetalia na mananao lava e asiasi i Tiavi ona e iai le fale o se mataaga e ta‘ua o le Lupesina i lea itu o le atunuu, e fau i se laau tele o loo i lea nofoaga. O le fale tonu la lea na ta‘ua e leoleo na tulai mai ai le faalavelave.

O le taimi lenei na ta‘ua e leoleo o le faamatalaga na ta‘u atu, o se tagata na alu atu ua a‘e i le laau lea a o tofafa le ulugalii mai i Ausetalia. Na osofai e lenei alii le nofoaga o loo iai le ulugalii ua saisai le tamaloa ae faamalosi le tamaitai o le paaga a lenei alii. E 28 tausaga o le tamaitai papalagi lenei ma na uma lava ona fai o le osofaiga sola ese loa.

O le tamaitai na ave i le falemai ma faamaonia ai le osofaiga ua faia e pei ona lipoti ane ai i le ofisa o leoleo.

E matuā faigata tele lenei ituaiga osofaiga aemaise i le taumafai ai o Samoa e faatosina mai tagata tafafao i Samoa nei. O lea la ua agai leoleo e saili se alii ua masalomia o se pagota i lenei osofaiga. O le faamatalaga a leoleo e lei maua lea alii ma e lei iai foi la se moliaga ua faia i le taimi nei.

O se tasi lenei o numera faatuputupulaia o pagota ua fai i ai suesuega a leoleo ma ua lē ‘asa lava foi se vaiaso ma le tulai mai o le faafitauli lea o le sosola o pagota i tua ae o lea lava la ua amata ona tulai mai solitulafono ua masalomia ai.

O le maliu o le tamaitai ia Faagutu Kelekolio lea na maliu ma maua lona tino maliu i luma i le auala i Faleula i le amataga o lenei masina, e lei iai se isi ua molia ae e toalua lelei pagota o loo fesiligia i lenei faalavelave.

O le vaiaso na tea nei na sui ai foi le faiga i pagota gasegase auā o lea ua agai sa‘o lava fomai ma tausi soifua mo siaki ta‘i vaiaso i Tafaigata ae ua lē o toe agai i fafo o le lotoā pagota auā o le isi auala lea ua tele ina sosola ai pagota mai le toese.

O le vaiaso foi na tea nei i le faaiuga na faasalalau ai foi se isi pagota o loo taofia i le tosoteine i Tafaigata ua sola ese foi o se faailo o le lē malu o puipuiga i lea nofoaga i lenei vaitaimi.

O loo faaauau lava la suesuega a leoleo i nei mataupu i Tiavi faapea ai ma Faleula.

Le fale na faatino ai le osofaiga i turisi