“Faapea o a‘u ua oti”..Andrew Thomas
O le galuega sa faagasolo i nai masina e lei mamao tele atu, o le laisene o taifau a aiga, ma tapu‘e taifau taaloa, ua aliali nei se faaletonu ua satia ai se alii tusitala o le faletelevise o le Aljazeera TV o Andrew Thomas.
Na faamatala le alii tusitala o loo faamautu i le faletalimalo o le Travellers Point i Malifa, o le po o le Aso Tofi na savali ai i se faleoloa e faatau ae o lona toe foi ane i le faletalimalo na osofai ai o ia e ni taifau se tolu a se aiga i Malifa e latalata lava i le magatolu o loo iai moli faasino ala.
“Faapeaa o a‘u ua oti, ona ou te vaai atu ua taufetuli mai taifau ma ōu. Na ona uma lava ona ‘ai o lo‘u vae taumatau toe taufetuli ese meaola”, o le faamatalaga lea a Andrew ma ona foliga fefe ona o le mea na tupu. Na nanati le pulega o le faletalimalo ma ave le alii i le falemai. Peitai na faamatala le alii tusitala, e taunuu atu i le vaega o gasegase tigaina le emergency room, o loo tumu gasegase o loo faasolo e vaai le fomai.
Sa lē mafai ai ona maua se fesoasoani vave e vaai se fomai ma faasino ai o ia i se tamaitai tausi soifua, poo se nurse lea na fufulu ai lona manu‘a ma tuu i ai se kulimi ma toe foi ai i le faletaalimalo.
E leai se faamatalaga tele a le alii tusitala na faia i le lē maua o se fomai e vaai i lona manu‘a ae ua lava le lūlū mai o lona ulu e iloa ai lona lē fiafia. O le tala a le pulega o le faletalimalo, na oo atu lava leoleo i le po lea ma faia le faamatalaga a le alii tusitala ona o le satia ai e taifau.
Na faailoa mai foi e Andrew o le tala atu a le alii leoleo na fesiligia o ia, o le a agai loa e fesiligia le aiga e ana taifau ma faia loa le gaioiga o le faalalo poo le tape o le meaola. O le tapuvae o le aao taumatau o le alii tusitala na afaina i le u a le taifau. O loo i Samoa le alii tusitala ma se alii pueata o le faletelevise lauiloa i le lalolagi o le Aljazeera e lipotia ma faasalalau mataupu o le fono a atunuu laiti tau atiae o le lalolagi.
O se tasi lenei o faafitauli ua fai ma tala lē lelei o le atinae o tagata tafafao i Samoa i le lalolagi, ona o nisi foi tulisi sa osofaia e taifau ma aafia ai. O le a tuliloaina pea e le Samoa Times le taunuuga o le faaletonu lenei, ma se gaioiga o le a faia e saga faamalosia ai aiga e vaai lelei se nofoaga malupuipuia e loka ai a latou taifau pe afai e feai, auā o nisi o aiga e fiafia i le tausia o nei meaola, ae lē ano e fau se nofoaga malu e tuu ai, i taimi e tatau ai ona loka ia lē feoai solo ma osofaia ai tagata feoai.
