Ua oso maualuga le fiva o le Malo i faasalalauga mai finagalo faaalia o le au fai polokiki poo Faipule o le Palemene i le Itu Agai ma nisi o Faipule o le itu a le Malo, e mafua i le fuafuaga e faatupe e le Malo o Saina le toe fausia o fale o le malaevaalele faavaomalo i Faleolo faapea le malae e taunuu ma malaga ese ai vaalele.
O le lilifa o lipoti salalau e ‘apo lagona tetee i le fuafuaga ma faamatala ai o se gaioiga o le a faatau ai e Saina Samoa, ua lē logo lelei i le Palemia ma le Malo. O nisi o lipoti ua mavae sa faaalia ai lea tulaga, peitai ua lua i le tolu vaiaso talu ai ia faasalalauga ma lagona faaalia, ae ua toe masaa mai i fafo se isi lagona faaalia o le Malo.
I se pepa o faamatalaga i le gagana Peretania ae ua leai se faaliliuina i le gagana Samoa ua faaalia e le Malo, e sese ma lē sa‘o ia lipoti ma manatu o le a faatau e Saina Samoa. “O atunuu uma o le lalolagi e faia atinae lelei e silafia e manuia ai tagata uma o se atunuu.”
Faaalia e le Malo o le gaioiga faatupu faalavelave lea na tulai mai i Europa i le atunuu o Farani e lē talia e Samoa ona o se gaioiga ua sosofa ai le saolotoga o manatu faaalia poo le freedom of expression.
“E ui i lipoti a ni nusipepa ma finagalo folasia o nisi o le au fai tofa o upufai o Malo (polokiki) , e lē solomuli ai le Malo e faaauau pea galuega ma atinae lelei e maua ai e tagata soifua uma o Samoa faamanuiaga”, o se isi lea o faaupuga i le pepa o faamatalaga.
O le toe fausia o fale i le malaevaalele i Faleolo o le a faatino i se nonogatupe e mamā le tului mai le Malo o Saina. O Saina foi o se isi lea o atunuu e pei ona saunoa pea le Palemia, Susuga Tuilaepa Lupesoliai Sailele Malielegaoi, o loo tu malosi i le tele o atinae i lona faatupega.
O lea foi atunuu ua saoasaoa lona atinae tau i pisinisi lea ua salalau solo i le lalolagi ona tagata o loo faia ai a latou atinae tau pisinisi, e aofia ai ma Samoa. O le tuualalo a le toatele i le Malo, e lelei Saina, ae ia faia fuafuaga ma le fuafua lelei ma ia faia foi ma le poto ma le mataalia ina ne‘i iai nisi tulaga e lē o iloa e ono aliali mai i tausaga o i luma.
