Auā o ē ua tuufaatasia ma faamauina i le feagaiga o le faaipoipoga, e le toe tuufaaeseeseina lava e se isi lava mea seia vagana le oti. O le autu lea o le upu faalaeiau na saunoa i ai le susuga i le faifeau, Pastor Charlie Reed na fai ma faamalosi ma faamanatu na tomatauina ai le tapenaga mo le aiga fou ua faavaeina nei o le susuga ia Magele Filemoni Gu ma lana manamea lalelei le faletua ia Fonoti Leu Gu.
Mataina le lava tapena lelei o mea uma o le faamoemoe o le ulugalii fou auā na matuā matagofie le vaaiga mai lava i le saunigalotu seia oo i le taimi o le ‘aiga ma faafiafiaga lo la aso fiafia lea na faataunuuina i le afiafi o le Aso Faraile na molimauina ai e le toatele o nai o la aiga, uo ma aumea mamae.
O faamanuiaga ma moomooga molipo mai o oulua aiga uma lava ina ua faataunuuina ma le manuia lo oulua aso fiafia Magele ma Fonoti Gu. Ia faavae i le Atua lo oulua aiga, ia oulua maua le fealofani ma le fetausiai ae faasilisiliina ai ia saga faatupulaia pea le alofa faamaoni o le tasi i le isi ma ia fua mai e tusa ma le finagalo o le Atua mo oulua.
O alofaaga mai o oulua tuaa ma aiga uma lava i soo se vaipanoa o le lalolagi ma Aotearoa nei. O alofaaga mai a oulua uo ma aumea mamae uma lava, ae faasiliina foi alofaaga ma faamanuiaga mo oulua mai le mafutaga a le Herbal Life and Fitness Club i Manurewa.