Osifeagaiga le Faifeau ma EFKAS Papakura

O le masina o Aukuso i le tausaga 2013 na faavae aloaia ai le aulotu fou lenei a le EFKAS i Papakura ma faapena loa ona galulue ai le susuga i le A‘oa‘o iu mai i le Seminare Faafaifeau i Kanana Fou Amerika Samoa, le Susuga ia Alosio Mikaele ma lona faletua o Vaito‘a Mikaele. O le Aso Toonai la lea na faataunuuina ai le faamauina o le osigafeagaiga a le susuga i le faafeagaiga ma lona faletua ma le la aulotu. O lea faamoemoe tāua na faataunuuina lava i le malumalu o le Faifeau Toeaina i Wiri ma ua avea ai nei la le susuga ia Alosio ma taitai o le lafu mamoe a le Atua i totonu o le aulotu fou a Papakura.
O le susuga i le faifeau toeaina, o le taitaifono foi lea a le matagaluega i Niu Sila ma Ausetalia mai Ueligitone, le Susuga Malaki Muaiava sa na taitaia le sauniga o le osiga o le feagaiga a le faifeau ma lana aulotu. O le susuga i le faifeau o Fonofili Toomata, o le failautusi foi o le Pulega a Aukilani na saunoa i le upu sa tomatauina ai loto ma agaga o tagata o le aulotu fou, ae o le Susuga Savali Ioane Fenunuti, sa feagai ma le tomatauina o le upu faamalosiau ma faalaeiau mo le susuga ia Alosio ma lona faletua auā le galuega ma lo la valaauina, mo le faataunuuina o le finagalo o le Atua i totonu o le aulotu e pei ona ua osifeagaiga ai nei.
O le susuga ia Savali ma le faletua ia Faaleava Fenunuti o mātua faaleagaga ia o le faifeau ma lona faletua ia Vaito‘a. Ma o se mitamitaga foi lea ia i laua ma le aulotu EFKAS i Otahuhu ina ua tau lau o le faamoemoe o le auauna ma lona faletua sa latou galulue faatasi.  O le faitauga o le Tusi Paia na feagai ma le susuga i le faafeagaiga o Pava Arona Pulemagafa, ma talosaga sa fofogaina e le susuga i le faafeagaiga ia Oto Tumanu.
O le taimi nei ua 12 matafale o le aulotu fou lenei ma ua vaaia ma maitauina le vave ona tupu ma ola o le galuega talu mai lona faavaeina i le tausaga ua tuanai atu. E matagofie lava le polokalame o le aso ina ua mae‘a foi ona muai ave mea i Matautusa ma maua le mafutaga a le aufaigaluega paia a le Atua ma le mamalu o le aulotu i se faamalositino na saunia lelei. O le tofa ia Fata Tofilau Sefo sa tu i le tootoo ma momoli le faafetai i le aufaigaluega aemaise o le paia ma le mamalu o le pulega e tusa ma le lava mai e molimauina lo latou faamoemoe.
Na mae‘a foi fuafuaga uma ma ta‘ape ai lea ma le mama ua lomi ma le vaa ua goto i le matagofie ma le felanulanuai o le taumafataga na saunia lelei auā le taliga o le sua. Ia o se mea lava ua mae‘a ma lelei, ia viia ai lava le Atua!