O le toatele o i latou sa auai i le faamoemoe, na o latou molimauina le agaga fiafia o le alii faaipoipo ina ua tau lau o le la faamoemoe.
O se tala foi na lea na molimauina i le toatele o aiga o le alii sa auai atu e molimau le aso fiafia o le tamaitai o Etevise Soonafai Enesi ma si a latou tamafanau, le alii mai Aferika i Saute, o Patrick Thomas i le Aso Toonai, aso 21 o Tesema. O mātua o le tamaitai, o Siatini Sagatea Enesi mai Satapuala faapea lona tamā o Enesi Ligilolo o Safotulafai. Sa taitaia lava le sauniga e le susuga i le Toeaina ia Rev Tauaaga Mataafa ma sa faia i le malumalu o le Eklesia EFKS Southwest Brisbane faapea foi le taumafataga i le Tiafau Hall i Willawong.
O le fofoga o le aso o Muagututi‘a Leka Lilomaiava ae o le tootoo o aiga na lua o le tofa ia Apulu Iliolemalae Asivao Kilipati.
O le sui o le auvalaalia sa molimolia se faafetai o Silofau Autagavaia. Na malaga mai foi le faletua o le faafeagaiga mai Niu Sila le faletua ia Soonalote Auelua faapea le tina o le tamaitai mai Samoa ia Sagatea Enesi mai Satapuala ma Safotu aemaise nisi o tauaiga sa molimauina le faamoemoe.
Sa matagofie fuafuaga o le aso auā sa fata luga fata lalo i le tele o le taumafa aemaise le faafiafiaina o aiga na lua. O fua lava ia o le sagisagi fiafia o mātua ma aiga i ni fanau e faapaia ma savavali i ala o le Atua.
Alofaaga mai lua mātua faapea lua aiga uma i Samoa, Niu Sila ma Ausetalia ae faapea aiga o le alii faaipoipo. Manuia le aiga fou!
