O osigafeagaiga, o nisi o aso faitaulia ma fiafia i soo tagata, faalapotopotoga, aemaise aulotu tapuai.
O le agaga lena na iai tonu le osigafeagaiga a le ekalesia EFKS i Timaru i le aso 6 o Novema 2010, ma lo latou faifeau fou, le susuga Rev Uosepi Paiaaua ma le faletua ia Tumanu.
O se aso mamalu na molimauina e le aofia na auai. Na amata ma taitaia le sauniga mamalu e le Tamā o le Pulega, le Toeaina ia Tumama Vili. O le Susuga Posala Tioa FS na saunia le tatalo o le Faapaiaina.
O le Susuga Perkings Waterhouse FS sa faitauina ma folafola le Upu mai le Afioga Paia, ae o le laugaina o Lona finagalo na nafa ma le Susuga Pelenato Fonoti.
Ona faapaia lea o le Ekalesia e ala i upu tautino i le va ai ma le auauna a le Atua, o Uosepi ma Tumanu i le Osiga o le Feagaiga. Sa valaauina i luma le Ekalesia e laulaututu ina ia agai atu le Misionare ma lona toalua, a o molimauina e le auvalaaulia.
Ona aumai lea o le Ie o le Osigafeagaiga se‘i Silatoga le Aofia aemaise le silasila molimau manino a le Atua Osifagaiga. Sa folasia le ‘ie ole feagaiga ona tumuli lea ole aulotu ae saga faamanuia pea ma osi le feagaiga e pei o upu o lena aso ile va ai o sui ole aulotu ma le faifeau. Na mae‘a lea ona folafola mai lea e le Ta‘ita‘i o le sauniga, o le “Osigafeagaiga ua Osia Nei”, ia saga faamanuia atu le Atua i le Valaauina.
Na faaiu i le Upu Folafola na laugaina e lana auauna, sosoo ai ma lana faamanatuga e faamautu ai le feagaiga ua mae‘a ona osi ma le Atua le Tamā o i le Lagi. Ua luluaao foi ma fusifusi i le feiloaiga faakerisiano, o fanau a le Atua i totonu o lona malumalu.
Na uma le sauniga i le falesa, ona agai atu uma lea i le Hall e tali le sua, ma faatino foi tu ma aganuu masani e masani ai aso faapenei, i faaaloaloga ma teuga eseese na feagai ma le EFKS Timaru e pei o le tele o faamoemoe.
Sa iloga ona taape le fuamanusina ina ua papa foi tumuai e fai foi o le taumafa, ae o faaaloaloga na maamaau i ai le EFKS Timaru, aemaise aiga-na-lua o le faafeagaiga ona o pelega lava o Fanau faaeaina. MALIETOA E!!! MALIETOA E!!!!! Faafetai le teu! Faafetai le faaaloalo. Ia manuia pea le Galuega fou i le EFKS Timaru.
Talaaga ma se tala o a la galuega:
O le faafeagaiga ia Rev Uosepi S Feii Paiaaua, e mai alalafaga o Matavai Safune, Sasina ma Aopo, Nuusuatia Lotofaga, ae o le faletua ia Tumanu A Isara-Paiaaua, e mai alalafaga o Moataa, Faleasiu, Falefa, Ulutogia, Vaiee, Lalomalava ma Falealupo.
O le tausaga e 1991 na faaiuina ai le taumafai mai le Kolisi Faafaifeau i Malua. Na faauu mai le avea ma faifeau tausinuu/failautusi fesoasoani a le Pulega Salega i le Matagaluega Faasaleleaga i le 1992-1998, a o galulue ma le faletua i Fogatuli Savaii.
Tuua le galuega, ona avea ma lea ma faigaluega faifeau e nafa ma musika a le EFKS i le Matagaluega a Tupulaga Talavou 2001-2006. Nafa ma le vaaia o le Aufaipese Muamua a Tupulaga Talavou a le EFKS na faatuina i le 2002.
Sa vaaia ma fesoasoani i le Galuega EFKS Moataa, aemaise le faipese i peselotu i le tele o alalafaga e iai Samusu Aleipata, Aopo Savaii, Matavai Safune, Ekalesia Metotisi Foaluga, Kolisi Teine Papauta, aemaise le EFKS Porirua i Ueligitone, ma o le ta laau foi mo Tuufaatasiga a Lotu o le Pasifika i Porirua.
O nisi o taumafaiga ua iai, o le Video Tape a le Aufaipese Tupulaga Talavou a le EFKS, aemaise le CD a Tupulaga Talavou EFKS a Waihemo Porirua i Ueligitone. O loo faamoemoe i se taimi e lē o toe mamao ona faalauiloa lea o le CD a le EFKS Timaru.
O le Faletua ia Tumanu sa galulue faatasi i le EFKS Fogatuli, sosoo ai ma le ofisa o le Komesina o Suluaiga, o se Matagaluega Tutoatasi i le vaaiga a le Ofisa o le Palemia. Sa toe avea ma Failautusi Sinia a le Faatonu o Aoga EFKS 2000-2006, ae o loo galue nei o se Health Community Advocate Worker mo tagata lautele i Porirua, ma faaauau ai pea a o iai nei i Timaru.
