(E 6 Ekalesia a le AOG Tutoatasi Samoa i Melepone na tuufaatasi mo lenei sauniga tāua)
O le Aso Maliu ma le Aso Sa o le Toetu o aso pito i sili ia ona tāua i le kalena a le au Kerisiano i soo se atunuu o le lalolagi, poo le ā lava foi le tapuaiga ma le tovine e tapuai ai le mamalu eseese o Samoa, e faatāua uma lava e Samoa le maliu o Iesu Keriso le Alo o le Atua, na togiolaina ai a tatou agasala.
I le agaga faatāuaina mo le Aso Maliu o lenei tausaga, na faataunuuina ai se mafutaga tuufaatasi a lala e ono o le Ekalesia AOG Samoa i le aai o Melepone, lea o loo faatamā pe taitai ai le susuga i le faafeagaiga taulagi ia Apouani Unasa ma le faletua ia Olevia, o le sui taitai aoao foi lea i le matagaluega a Ausetalia.
O isi o faafeagaiga o loo latou galulue auā le faatalaleleiina o Samoa ma soo se agaga i Melepone, o le faafeagaiga ia Tavita Anetipa ma le faletua ia Eseta, le susuga ia Solomona Vaofusi ma le faletua ia Moana, le susuga ia Teofilo Robertson ma le faletua ia Lilly, le susuga ia Tafao Lalotoa ma le faletua ia Leafa, faatasi ai ma le susuga ia Tuigamala Tuigamala ma le faletua ia Aisa lea ua amataina le mafutaga, ae ua fuafua e faapaia ma faauuina i le masina o Iulai.
O se tasi o tulaga na maualuga atili ai le faatasiga o le Eseta, ona na mafuta mai ai ma le taitai aoao o le matagaluega a Samoa, le susuga i le faafeagaiga ia Tulua Peti ma le faletua ia Leinati, lea na tulai mo le upu folafola i le Aso Faraile atoa ma le Aso Sa.
O le susuga ia Apouani na taitaia le sauniga o le Aso Maliu, ae o le susuga ia Teofilo Robertson na feagai ma le lufilufiina o le tino ma le toto o Iesu, a o le faatasiga i le Aso Sa, o le susuga ia Tavita Anetipa na taitaia le sauniga, ae o le faamanatuga na nafa ma le susuga ia Solomona Vaofusi.
Na talimalo le mafutaga i le Aso Faraile i se tasi o faafeagaiga asiasi ane le susuga ia Pu‘e Lemamea. Na maua se feiloaiga ma le susuga ia Ps Apouani Unasa ma ia saunoa ai, o nisi o polokalame faaolaola agaga a le faleono ua faataoto mo lenei tausaga, o le mafutaga a autalavou (youth Rally) i le masina o Me, lea o loo faauluulu ai le susuga ia Willie Unasa i le vaega o Autalavou a le matagaluega, faatasi ai ma nisi mafutaga tuufaatasi se tolu a Ekalesia uma e ono a le matagaluega.
O sauniga uma o le Aso Maliu na faataunuu i le malumalu o le susuga i le taitai i le pitonuu o Thomastown. Na mae‘a le sauniga i le Aso Sa ona alo ai lea i le taumafataga tele o le Aso Maliu ma ta‘ape ai ma le faamanū ma le viiga o le Atua ua maualuga. Viia le Alii!
