Afioga i le Konesula o Samoa ia Faolotoi Reupena Pogi faapea faauluuluga o kamupani e lua le Samoa Airways ma le MYRIVR

Afioga i le Konesula o Samoa ia Faolotoi Reupena Pogi faapea faauluuluga o kamupani e lua le Samoa Airways ma le MYRIVR

O le afiafi o le Aso Lulu na saini feagaiga ai le kamupani vaalele a Samoa le Samoa Airways ma le kamupani o le MYRIVR, e ala lea ise faigapaaga e vavaalua ai i le tapenaga lea o tatou tagata Samoa o loo mafai ona malaga mai ma aumau i Niu Sila nei.

Ua le gata i o tatou tagata Samoa ae ua faasafua foi lea mo isi tagata mai isi atunuu o loo fia agai mai e nonofo i atunuu i fafo.

O se faigapaaga ua saini lima uma iai faauluuluga o kamupani e lua le afioga ia Inu Akerei Maresala Thomson o loo faauluulu iai le kamupani o le MYRIVR faapea Toloafa Elia Chan o loo vaavaalua ma le susuga ia Inu Akerei faatasi ai ma le alii pule o le Samoa Airways ia Mailo Tiaga Alfred Senara.

O le tuu mai o le tauau o le MYRIVR i le kamupani vaalele a Samoa ona o le MYRIVR o se auaunaga o loo faavae ma galulue ai alo ma tama fanau a Samoa lava latou ae ose avanoa lelei foi lea e ono fesoasoani ai le MYRIVR i le tapenaina lea o vaega uma e ao ona malamalama ai o tatou tagata Samoa i le agai mai i totonu o Niu Sila ma nonofo ai.

O lona uiga e ao i le tagata malaga mai i le Samoa Airways mai Samoa ona silafia ma malamalama i le olaga o Niu Sila, e ala lea i le paketiina o tupe poo le faasoaosani o tupe i mea totogi, o fale e nonofo ai ma isi lava vaega o loo faasoa iai tupe i nei atunuu.

O le taua la o lenei faigapaaga, ae e te lei malaga mai i Niu Sila e ao ona e silasila i luga o le upegatafailagai poo le app a le MYRIVR o iina e tali uma ai fesili i mea o loo e fia malamalama ai i le olaga i nei atunuu.

 Sainiga o pepa o le osigafeagaiga a kamupani e lua, Mailo Tiaga Alfred Senara ma Inu Akerei Maresala

Sainiga o pepa o le osigafeagaiga a kamupani e lua, Mailo Tiaga Alfred Senara ma Inu Akerei Maresala

E talitonu le auaunaga a le MYRIVR, o le tasi lea vaega o loo tupu tele ai faafitauli i nei atunuu i totonu o aiga ona ua le iloa e aiga ona faasoa le tulaga o seleni mo mea totogi aemaise o faalavelave i aiga i Samoa ma se tupe e totoe mo le aiga.

O le MYRIVR o se app faasino ala pito sili lea ona tele mo matagaluega eseese a le komuniti e silafia ai ma mafai ai ona fesootai i se taimi vave ma tagata e sili atu i le 20,000 mai matagaluega, e sili atu foi i le 7,000 mai le soifua maloloina faapea nisi o matagaluega i soo se itu o le atunuu e mafai ona fesoasoani ia oe. Afai ua e manatu ua le amanaiaina oe o le MYRIVR e mafai ona fesoasoani mo oe.

O le agaga faafetai a le susuga i le alii pule ia Mailo Tiaga Alfred Senara i le susuga ia Inu Akerei Maresala ma le auaunaga a le MYRIVR ona o le amanaiaina foi o le tautua a le kamupani vaalele a Samoa le Samoa Airways e fesoasoani ai mo tapenaga o tatou tagata o loo mafai ona malaga mai Samoa.

O le faigapaaga lenei, e le o tilotilo le kamupani vaalele i se seleni e maua mai ae o loo ave le faamuamua a le kamupani i le saogalemu a le aiga pe a malaga mai, ia maua se fesoasoani mo aiga nei e ala lea i le saili i luga o le app a le MYRIVR ona malamalama ai lea i matagaluega e ao ona agai iai mo se fesoasoani pe a oo ina taunuu mai i nei atunuu.

Pei ona saunoa le susuga i le alii pule ia Mailo Tiaga Alfred Senara, e aoga foi lea app lenei mo aiga ma tagata o loo nonofo i Niu Sila, afai e iai se mea o loo fia maua ai se fesoasoani mo aiga, e ala lea ini matagaluega e mafai ona tali le app lea mo tatou manaoga ma mea o loo fia malamalama ai.