Rev Evile Loli ma le faletua ia Selema Loli
O le faamoemoe ua taunuu o le laau lea o le ola. Sa taumate i le soifua o le aufaigaluega ma le matagaluega i Otahuhu aemaise o aiga na lua pe aulia lea aso ua atofaina e osia ai lenei mafutaga mafanafana ona o le Talalelei a le Atua. O le viiga lea e mua i le matai e ona le aso ma le polokalame ua faataunuuina ai ma le fiafia lenei mafutaga.
O le afiafi o le Aso Faraile, 10 o Oketopa na momoli ai e aiga na lua le latou ositaulaga auā le faataunuuina o le finagalo o le Atua ua valaauina ai lo laua soifua. O le malumalu o le Ekalesia ma le maota o le matagaluega i Otahuhu sa faataunuuina ai lenei faamoemoe.
Na malaga mamao mai lava i Samoa aiga o le faafeagaiga ia Evile Loli ma le faletua ia Selema e tuu aloaia atu i lima o le Ekalesia i Otahuhu lo latou leoleo mamoe. O faasinoti e lua a Aukilani, o Aukilani i Matu ma Aukilani i Saute faapea auaiga o le faafeagaiga ma lona faletua na auai uma e molimau lenei feiloaiga.
O le susuga ia Rev Fomai Lafaialii sa taitaiina le sauniga lotu e faapaia ai lenei mafutaga, ona sosoo lea ma le usu faaaloalo a faasinoti e lua e tusa ai ma le tu ma aganuu a Samoa i feiloaiga faapenei. O le faasinoti a Aukilani i Matu na saunia le taumafataga.
O le autu o le aso o faaaloaloga, lea sa tu tootoo ai le tofa ia Loli Misilei faatasi ai ma le fesoasoani a le susuga i le faafeagaiga ia Rev Iosia Faleupolu e fai ma sui o aiga na lua e molimoli se inati mo le faasinoti a Aukilani Matu aemaise o le matagaluega i Otahuhu. Sa tala ie o malo ma molimoli teutusi auā lava le lupe faalele o aiga na lua ua tofia mo le galuega.
O le tofa ia Fagamalo Aiolupo sa fai ma sui o le matagaluega i Otahuhu aemaise o faasinoti e lua e fai se faafetai i le paia o aiga e tusa ai ma le faaaloalo ua maau i ai i lenei feiloaiga.
O le susuga i le faafeagaiga ia Rev Evile Loli ma lona faletua ia Selema, na iu mai le kolisi o Piula i le tausaga 2005 ma agai atu loa ma galulue i totonu o le ofisa i Faleula i le 2005 i le 2006. Na toe see atu i Afiamalu i le tausiaina o fanua o le Ekalesia i le 2006, 2007; o le ogatotonu o le 2007 sa toe foi ai i totonu o le ofisa ma faaauau le galuega i lalo o le atinae seia oo i le 2008.
O le 2009 seia oo i le 2014 sa galulue ai loa o se sui o le Ekalesia i le faiga o oka ma totogi o le aufaigaluega sa latou fausiaina le malumalu o Uesele. Ma o le la matagaluega muamua lea ua galulue ai i tua o Ekalesia.
O Rev Evile Loli e mai le afioaga o Malie ma Vaipu‘a a o lona faletua ia Selema e mai le alalafaga o Gataivai.
