Osi feagaiga Ekalesia SDA e tolu i Brisbane ma le Faafeagaiga fou

Ua tele le saito e seleseleina ae toaitiiti le aufaigaluega. O le aoauli o le Aso Sa, aso 24 o Ianuari 2010, na osia ai le feagaiga a le susuga i le faafeagaiga taulagi ia Tusitina Faiumu Ioane ma le faletua ia Lata, faatasi ma Ekalesia Aso Fitu o le Toe Afio Mai e tolu i Brisbane.
O le susuga i le faafeagaiga ia Tusitina Faiumu Ioane, o se Lupe Faalele a le paia o Aiga Salevalasi, Tautalaga ia Faiumu, Falefa ma Faigata ma le Mamalu ia te oe Salemuliaga, o le Faleupolu o Tofiga a le Tupu.
O le faletua ia Lata e mai le alalafaga o Safa‘i i Matautu: Afifio aiga o Sa-Peseta ma le Ma‘upu, maliu mai le Nofo Usoalii ia te oe le Faleiva, ma le mamalu ia te oe le Matautu. Sa galulue muamua le susuga i le faafeagaiga ia Tusitina, le faletua ma le nofoaalo i nisi o Ekalesia Aso Fitu o le Toe Afio Mai i Melepone, peitai ua valaauina i latou aua le galuega a le Atua e tausia ekalesia e tolu i Brisbane.
Sa taitaia i se sauniga lotu e le Susuga ia Pr Ieti Ah Siu, Ekalesia Aso Fitu o le Toe Afio mai i Logan City. Na paia ma mamalu le aso auā o nisi o matai tāua o le aiga sa malaga mamao mai e molimoli mai le susuga ia Tusitina & faletua e aofia ai le Tautalaga ia Faiumu Faaeteete, (Samoa) Faiumu Alapati, Faiumu Tuii & Feta’i, le afioga i le Matua ia Toilolo Tamafili & Vaiuta, Tamala Taifa‘i, Tamala Ioane, Tamala Peni & Mati, Tamala Tafeaga & Litia, Tapuai Tautua, Tapuai Nofoalii & Susana, le tuagane o le faletua o Lata ia Seve ma Le‘au, Toilolo Talosaga & Pei, Tamala Fiu Malatai faapea Nofoa Potoi, Luisa Tamala Iosefa, Talaia Kolio mai Sini ma le tele o aiga sa opogi le faamoemoe.
O se aso uigaese le matagofie auā e moni ai le tasi upu masani o le Afioga Paia a le Atua, “Se mea ina a lelei o uso ae nonofo faatasi”.
O le toatele o aiga-na-lua sa malaga mamao mai lava i Sini, Melepone, Grifith, Adelaide ma Samoa auā lenei aso sa taupoina, e feiloai ai aiga-na-lua o le susuga i le faafeagaiga faatasi ai ma le paia ma le mamalu o Ekalesia Aso Fitu o le Toe Afio Mai – Ipswitch, Pine Rivers ma Caboolture i le Setete o Kuiniselani nei.
Na tasi moemoe le futia ma le umele o aiga-na-lua e avea le Tautalaga ia Faiumu Faaeteete Faiumu, sa malaga mai Samoa, e molimolia se faafetai tele i Ekalesia e tolu ona o le felanulanuai o taumafataga sa tapenaina & faaaloaloga matagofie aemaise lo latou laufofoga fiafia.
O le Susuga ia Lavea poo Lagaaia sa fai ma sui o Ekalesia e tolu e faafetaia le paia ma le mamalu o aiga-na-lua o le susuga i le faafeagaiga, ona o nisi foi o faaaloaloga masani a le atunuu e pei ona faaalia i lea aso.
O le Fofoga o le aso o le susuga ia Tuu Telei‘ai Ierome mai le Ekalesia a Ipswitch. O le taitai toeaina o le Ekalesia a Ipswitch, le susuga ia Ilimatogafau Limu, taitai toeaina o le Ekalesia a Pine Rivers o le susuga ia Laufili Haueia, faatasi ai ma le ekalesia a Caboolture, o Salome.
Ia manuia le galuega fou ua valaauina ai oulua, le susuga i le faafeagaiga ia Tusitina ma le faletua ia Lata Faiumu ma le nofoaalo. E manatua ai pea matua ua fai-i-lagi folauga ia Faiumu Ioane ma Siliva Faiumu.