O le ‘auga o aute e pei ona afea ai Kuiniselani e le faigamalaga a Samauga mai Samoa, o le fia faafouina lea o le malumalu tapuai o le Atua ma le maota o le galuega i Samoa o le Ekalesia EFKS.
O le faafeagaiga o loo tausia le ekalesia, o le susuga ia Rev Vavae & faletua ia Feleni Maua e lē o malaga mai ae ua tuu atoa le faatuatuaga i le aumalaga e fai ma sui e malaga mai auā le tau sailia o seleni o le faamoemoe.
O le aumalaga o loo faaopea ai i Ausetalia e aofia ai le Afioga i le faipule o Gagaifomauga Numera II, le tofa ia Sooalo Mene ma le faletua ia Losa Faausu, tofa a Fuivaa Tativa, tofa ia Sooalo Timo Taumaoe, tofa ia Sooalo Melaina Leniu, tofa ia Sooalo Poka ma le taitai pese, le tofa ia Sooalo Riki Selulo.
Na ta‘ua mai o le agaga moni ina ia taofi pea le faaailoaina o se aofaiga o le seleni seia mae‘a nisi faamoemoe. O loo faamoemoe a mae‘a le sailiga seleni i le setete o Niu Sa Uelese ona siitia atu lea i Niu Sila ma toe taliu ai i Samoa.
O loo faatauina le MTV ma le CD logo mālie i le tau e na o le $20 Ausetalia mo vaega uma e lua. O lenei faamoemoe sa tuufaatasia e le afioga ia Toleafoa Nonumalo Sa Toleafoa sa ia pueina fua le DVD ona o le fia fesoasoani foi i le sailiga seleni a le afioaga.
Na fatuina pese lotu e le susuga i le faatonu, susuga ia Rev Vavae Mauga, o loo iai foi viiviiga o laufanua sa fatuina e le tofa ia Sooalo Melaina.
O le Taitaifono o le Mafutaga a Samauga i Brisbane o le tofa ia Fui Ioapo; o le Peresetene o le tofa ia Lilo Nimo, ma le Failautusi/Teutupe o Falefia Sooalo.
O fea lava se tafā o le lalolagi o iai le Isaraelu moni, e susue lava lona faamalama ma tepa i le nuu na soifua ma ola a‘e ai. Mo alo ma tamafanau, paolo ma gafa e malu ai Samauga o fia moomia le fesootai mai, valaau le Telefoni 0401 472 064, Sooalo Riki i le 0481 190 476.
