O le ‘alaga ua lauvivilu ai Falealili, E! ta fia Falealili fua. O le ala lea o le laasia ma afea e le afioga ia Fuimaono Taala Fonoti Samuelu Te‘o Kuiniselani auā e nanau a tagata o si ona nuu ma le itumalo i le mau tauave foi lea, “E susue le faamalama o le Isaraelu moni ma silasila i lona nuu.”
Sa pei na atoa se masina na faalauiloa ai lea to‘ai taunuu o le faigamalaga i le opogi ma le lolofi ane o tauaiga, uo ma ē masani o le itumalo o Falealili e lagolago le faatalau’ula ane a le afioga ia Fuimaono a o sauni atu e tamoe mo le tofi o le isi itu auā ua vaeluaina le itumalo o Falealili.
Na iu manuia le sailigaseleni a o faaopea ai i Kuiniselani ma si ona faletua, e lē gata o tusivalaaulia a o saasaaga faa-Samoa. Na o la tauaaoina le foai a le atunuu e lata i le $15,000.00 i le po o le Aso Toonai, 23 o Ianuari o le vaiaso ua tuanai.
O nisi o ana saunoaga i le ‘auga o lona faamoemoe na ia saunoa ai e faapea, “Ona ua lē mā le mativa, ta te fia faaogea i lota pa‘usisi, ae ta te fia saili malo mo lo‘u itumalo pele o Falealili. Ua ou uia ala i tagata, ma faatagisia maa o pa faamau alofa, ona o le faamoemoe o lo tatou itumalo mo lana faigapalota.
“O le agaga ia te au, ta te fia tautua mo lota itumalo Falealili! Ua vaeluaina lo ta iutmalo i itu e lua ae tele ni vaega e fia tautua ai e pei o auala tetele ma auala galue, moli i tafāala, faleaoga ma falemai i nisi vaega e toe faaleleia.
E fia fausia foi ni apitagalu e faaleoleo mo faalavelave faalenatura, talosaga ni tane vai mo suavai ma isi lava vaega. O le mea e lelei i Apia, e lelei foi mo Salani, Sapo‘e, Utulaelae, Salesatele ma Si‘uniu,” o le saunoga lea a Fuimaono Taala Fonoti Samuelu Te‘o.
O le afioga ia Fuimaono Taala Fonoti Samuelu Te‘o o loo avea ma sui Faatonu o le Public Affairs a le ekalesia a Iesu Keriso o le Au Paia o Aso e Gata Ai i le ekalesia aoao i Samoa e aofia ai Savaii ma Upolu. O loo avea foi ma Youth Director a le ekalesia ia Samoa atoa.
O le afioga ia Fuimaono Taala Fonoti Samuelu Te‘o, o loo i totonu foi o le Board o le komiti o taaloga a Samoa, ua ova ma le 10 tausaga o avea ma sui Peresetene, o taaloga e aofia ai le Olimipeka ma le Oceania.
Ua ova ma le valu tausaga (2001-2009) o avea ma peresitene lagolago o se tasi foi Board i totonu o le Oceania e aofia ai Ausetalia, Niu Sila, Tonga ma isi atunuu e 18 o le Pasefika i le taaloga lea o le Basket Ball.
O i tonu na agavaa ai ma filifilia ai Fuimaono e ofi atu i le S.A.S.A.N.O.C. (Samoa Affiliated Sports and National Olympic Committee).
O le taimi nei o loo avea ma pulenuu a Si‘uniu Falealii, ae fainuu i nuu e tolu o Falealii ma ia umia foi le tele o suafa matai e ova ma le sefulu.
E tele nisi o agavaa ma faiva o le afioga ia Fuimaono; o ia o le construction manager i lana pisinisi Triple T Construction, e faatinoa galuega o le faiga o fale, valifale, falesa, uelo, eletise. O lenei konekarate e fesoasoani i le fausiaina o malumalu ma maota o aiga aemaise o fale o le malo.
Na momoli le agaga faafetai o le afioga ia Fuimaono Taala Fonoti Samuelu Te‘o i nai tauaiga, uo ma ē masani aemaise si ona itumal o Falealili ona o le latou talisapaia o lona faamoemoe ua lava ma totoe seleni ua foai, e taliaina faatuaeleele ma le agaga faafetai.
O si ona uso lava o loo aumau i Brisbane le tofa ia Apulu Faaolataga Te‘o sa fai ma Fofoga o le po e faafeiloai le paia o le auvalaaulia.
Na talifuaitau le fetalaiga ia Taupa‘u Masina e fai ma sui o le atunuu ma le auvalaaulia i tapenaga matagofie ua faamalieina ai itu uma ma le agaga faafetai.
