Na siisii siufofoga o sui faipule o le Palemene na faitioina le teuteuga mulimuli a le Minisita o le ofisa o le Komesina o Faigapalota sa autu i le faamatalaina o le upu tautua mo se matai e fia tauva i le palota.
Ua pasia le teuteuga lona fā ua aiaia ai le tolu tausaga e tatau ai ona faia le tautua a se matai i totonu o lona nuu ona agavaa lea e avea ma sui tauva pe afai e fia ulufale se matai o le atunuu i tofi o le Palemene.
Sa fesiligia le teuteuga lea poo le ā tonu le tautua, ma o le mafuaaga lea o le teuteuga lona lima lea ua faasino ai le tautua mo le tolu tausaga i se nuu o itumalo faafaipule i le faia o le monotaga a le matai.
Peitai mo se matai o se isi nuu o loo nofomau ma lona aiga i se eleele lisi poo se fanua umia saoloto i totonu o itumalo tu taulaga i le Vaimauga ma Faleata e manaomia lana tautua e faia i se ekalesia poo se isi lava faalapotopotoga mo le tolu tausaga ona agavaa lea.
O le faamaninoga lea o le upu tautua na faamatalaina ai e le faipule o le Vaimauga i Sisifo le tofa Lefau Harry Schuster le teuteuga e mataivi le vaai a le tulafono. Na saunoa le alii faipule e leai se mea o le a faaeseese ai ituaiga o tautua e manaomia ona agavaa lea o se matai e avea ma sui tauva o le palota, ona o loo tutusa uma tautua o loo faia e i latou o nonofo i totonu o itumalo tu taulaga ma i latou o alala i nuu mavae o itumalo faafaipule.
Na faaalia foi e Lefau e lē tatau ona faailoga tagata pe faaituau le vaai a se tulafono ona e tutusa tagata uma i le tulafono. O le saunoaga a le Faipule o Faleata i Sisifo le tofa Lealailepule Rimoni Aiafi, na ia faitioina ai le teuteuga ona ua foliga o le a faigofie le avanoa o le matai o loo nofo i totonu o le itumalo tu taulaga, ae faigata le avanoa o le matai o loo alala i le nuu mavae o le itumalo faafaipule poo le territorial constituency.
O finagalo lagolago o nisi o faipule i le teuteuga na faailoa ai e le faipule o Palauli le Falefa le afioga Faumuina Tiatia Liuga, o le tāua o le teuteuga ona o lea ua alu tala‘iga a nisi sui ma fai i matai o loo nonofo i itumalo tu taulaga o latou e lē mafai ona toe lesitala i tumalo faafaipule. Na faaalia foi e Faumuina o nisi o tagata faigaluega sinia a le Malo o loo fuafua e tauva i le palota o loo latou faaaogā taavale ma tagata faigaluega a le Malo ia latou tapenaga.
O le tele o faitioga ma finagalo lagolago na faamalamalama ai e le Palemia le agaga o le teuteuga ona o lana saunoaga, o le monotaga o le mea patino lava lea a soo se matai e fai i lona nuu o loo matai ai, ma e lē tutusa le matai o loo fai le monotaga ma le matai e leai se monotaga ae o loo alala i se nuu o itumalo tu taulaga e leai ni faiganuu e faia ai.
O le finagalo foi lea o le Minisita e ana le teuteuga le afioga Fiame Naomi Mataafa sa ia faaalia, e lē tatau ona toe faia ni faiganuu fou e tuu i ai ni pulega a alii ma faipule, auā ua iloa ma manino eleele lisi ma eleele umia saoloto e lē o ni nuu mavae.
E ui ina tetele saunoaga a sui faipule ua latou lē talia le teuteuga ae o le saunoaga mulimuli a le Minisita o faigapalota na toe tali ai i vaega na laga e sui faipule, ia onosai ia ma sauni loa e tui meafaipelē ua lata mai le isi palota.
