E iva faalapotopotoga ma aoga i Samoa ole a manuia ini foai tupe mai se fesoasoani e selau afe tala Samoa na tuu faatasia ise suegatupe ose taumafataga ole afiafi na faamaopoopoina i Aukilani ma Ueligitone ele vasega fā poo le Form 4 ole Kolisi o Sagato Iosefo ole tausaga e 1988, lea ua ta‘u faapuupuu ole 4SJC 88 ma Uso poo le Marist Juniors.
E ono masina sa taumafai ai le faamoemoe lenei sa galulue faatasi ai Mafutaga ale Malisi mai Ueligitone, faatasi ai ma le lagolago ale Malisi Samoa i Aukilani ae na polili malosi ile lagolago ale Asosi Faatina ale Malisi i Samoa.
E fā taumafataga afiafi poo corporate dinners sa faatino i Aukilani ae tasi na faatinoina ile laumua i Ueligitone.
O faalapotopotoga e iva i Samoa ole a maua tufaaga mai le selau afe ole:
1. Tamaitai Sa Monike i Vailima
2. Nofoaga o tagata matutua i Mapuifagalele
3. Aoga a Felela Malisi i Mulivai
4. Sagato Iosefo i Alafua
5. Aoga a St Peters i Falefa
6. Aoga a St Therese i Lepea
7. Aoga a St Joseph’s i Leauvaa
8. Aoga a St Therese i Safotulafai
9. Aoga a Sacred Heart i Safotu
Faalia ele taitaifono ole Komiti ale Felela Toeaina ma ole Taitaifono foi ole 4SJC88 MA USO poo le Marist Juniors, Faimalotoa Muliagatele Aleni Stowers, ole viiga ma le faafetai e faafoi ile Atua ua a’e ma le manuia lenei taumafaiga, ae momoli le faafetai tele i Sponsors, o matua, aiga ma uo aemaise o paaga ale Malisi faapea mafutaga a Kolisi eseese sa tuuina atu lo latou tauau e lagolago ai le faatauina o laulau mo ia sailiga seleni e lima.
Ole agaga fiafia foi e pei ona faailoa mai etetaitaifono ona ole uluai taimi lenei ua galulue faatasi ai le Marist Juniors ma le Malisi mai Ueligitone faatasi ai ma le Malisi Samoa i Aukilani faapea totino faatina ole Malisi i Samoa ise taumafaiga faapenei aemaise ole toatele o aoga ma faalapotopotoga ole a manuia ai.
Ua iai le faamoemoe ole masina fou o Tesema ole a tuuina atu ai le foai e 50,000 afe tala Samoa ile Asosi faatina ale Malisi i Samoa auā latou sailiga seleni oloo faagasolo e fesoasoani ai i aoga a Felela i Mulivai ma Sagato Iosefo.
Ole tausaga fou pe a aulia ua fuafua e malaga ai sui ole Komiti faapea le Malisi Ueligitone ma le MBOPA Aukilani e tufatufaina isi seleni e pei ona fuafuaina le tuuina atu ole $20,000 afe tala Samoa mo Tamaitaisa Monike i Vailima, $10,000 afe tala mo Mapuifagalele, ae faasoa le isi $20,000 afe tala samoa mo aoga e 5 mai Upolu ma Savaii ua lautogia. Taua etetaitaifono, oloo naunau le Komiti ina ia maua ni meataalo e faaopoopo atu i nei meaalofa tupe pe a oo ina tauaaoina faamanuiaga mo ia aoga i Samoa.
