Ua tautino mai nei ele faifeau EFKS i Siufaga Falelatai, Susuga Opapo Soana‘i Oeti, e leai se tupe ale malo poo tagata togi lafoga a Samoa na faaalu ile latou malaga ma lana fanau i Roma.
Ae o lana faafetai maualuga, ile taitai ole malo, Afioga ile Palemia, Susuga Tuilaepa Lupesoliai Sailele Malielegaoi, i lana fesoasoani tupe $10 afe tala. Ile talanoa a Opapo, ole $10,000.00 lea ole siaki tupe ole meaalofa ale Palemia ma le faletua ma le fanau ile faatuatua i lenei feau na amata ai le fesoasoani, faatasi ma nisi o ofo mai Kamupani ma faalapotopotoga na agalelei mai, faatasi ai ma le Ekalesia i Siufaga i Falelatai, aemaise o la aiga ma lona toalua ia Luisa.
Ua faitioina ai foi ele faifeau ofisa faasalalau na o latou lomia nei tuua‘iga, faapea ua maumau tupe o lafoga ale atunuu ile latou malaga.
E talitonu Opapo o ia itua‘iga o tuua‘iga e aafia ai le tagata ile tulafono ole taufaaleaga ile taitai ole malo, aemaise o ia ma lona aiga. Auā e leai ma se sene o lafoga a tagatanuu o Samoa na o latou faaaogaina.
Ile tau faapupulaina lava o lenei mataupu tau i tupe, e oo mai nei oloo togitogi pea le aitalafu ole pasese ole toe foi mai o lona aiga i Samoa, talu ai ua ova aso na nonofo ai i Roma, ua afua ai le toe totogi atoa lava o pasese e omai ai. Ua ia tautino pe ole vaiaso fou e faauma ai lena vaega ole aitalafu ile ofisa Malaga ole Global Travel i Apia.
E lasi faamatalaga o lenei Malaga misiona i Roma, auā ua aliali mai ai foi ma le mafuaaga na laitiiti ai le taulaga ale EFKS Siufaga Falelatai, ona na ofo atu nisi o tupe e fai taulaga ai mo lenei feau ua latou talitonu iai o faaaliga mai le Alii, ile faamatalaga a Opapo.
Ua faamauina foi e Opapo e leai se sene e tasi a Toeaiina ole Pulega poo le Ekalesia aoao o nofo aitalafu ai lona aiga. Ole tala a Opapo, e le masani lona aiga e faia ni auala sese e faaaoga ai le afu o tagata.
Ina ua taunuu le Malaga i Roma na fesoasoani iai le Konesula o Samoa, le Susuga Papalii John ma Margi, o alo faasino ia Dr Kafarelli ma Alauni auā o nisi na o aiga milionea i Roma.
“O lena aiga oloo matou nonofo aitalafu ai ile agalelei, auā o latou sa gafa ma le totogiina o nofoaga sa nonofo ai, ole tausiga i soo se mea, aemaise o Patele ma Taupousa i Roma.”
Na malosi lava le talanoa a Opapo, mo le faamaoniga o nei faamatalaga ua ia aumaia faatatau i tupe na faaalu ile latou malaga, na ia fesiligia pea le alii Palemia, ma ia sailia foi le faamaoni mai le ofisa Malaga ale Global Travel i Apia, auā oloo silafia ele pule le totogiina o latou pasese.
Ua ia tautino foi “e le afaina le faamativaina ai o ma‘ua ma o ma aiga ma le Ekalesia i Siufaga ma nisi o agalelei ae sau aso e malamalama ai le mea moni.”
E oo mai ile Aso Faraile ole vaiaso ua tuanai pe toe $2afe ma ona tupu le aitalafu ole latou pasese ole toe foi mai i Samoa e lata ile $10afe, oloo tau togitogi ile taimi nei.
Ole isi manumanuga ole Susuga Opapo, ona ole ta‘uvalea ma le faitioina o laua ona o faaupuga lē moni ua faalele i luga o faasalalauga, talu ai lava le aveseseina ma le pito tasi o faaiuga fai e le gata ole aufaasalalau ae o Toeaiina ole EFKS, ua amo ai lona faasalaga ae lei fesiligia lava o ia mo sona manatu, e oo mai ile taimi na tusia ai lenei tala.
