Ole Tui Atua na Fagota ile Tai Loloto ae lē ole Tai Papa’u

Tuala Tagaloa Tusani, Dr Patricia O’Brien ile tatalaina o ole Tusi ole Tautai
Tuala Tagaloa Tusani, Dr Patricia O’Brien ile tatalaina o ole Tusi ole Tautai

Ua fetaui fola i upu tomua ole po ma le igoa ole tusi ale Tui Atua Tupua Tamasese Efi ua faaigoaina ole TAUTAI. Pei ona saunoa le taitai ole sauniga le susuga ile faafeagaiga ia Rev Logopati Mata’afa sa fai ma ositaulaga ile Atua ile po ole Aso Tofi 24 o Aokuso i Malaeola ile tatalaina ole tusi ale Tui Atua e faapea, ole afioga ile Tui Atua na fagota ile tai loloto ae lē ole tai papa’u.

Faatusa le saunoaga ale faafeagaiga ile mau sa tatai iai lagona o tagata i lea po ia Peteru ma lona faiva. Ole faatonuga ale Alii Faaola ia Peteru e tuutuu le upega ile loloto na mafua ai ona tele ana i’a sa maua i lona faiva. Ole faatonuga na maua ai manatu ole tautai ia Peteru, ole sailiili ma le finau ile loloto ole sami na manuia ai le faiva.

Ole ata manino lea na tatalaina ile faasoa ale taitai ole sauniga, ile saili malo ma le silasila mamao ole afioga ile Tui Atua ua mafua ai ona maua lea faalumaga lelei mo fanau poo tupulaga lalovaoa o Samoa e ala ile tusi ua lomia e faamatala ai le Mau o Samoa ile saili malo o ona tagata ua mafua ai ona saoloto mai i pulega faakolone a isi atunuu.

Ua lologo le faafofoga ale toatele o tagata sa auai i nai tina ma tamā matutua, aemaise o faauluuluga o kamupani oloo pulea e nisi o tamafanau ole tatou atunuu, faapea foi i uo palalagi, aemaise lava i tupulaga talavou laiti oloo a’oa’oina ile aganuu Samoa a’o talatala mai lana afioga ile Tui Atua Tupua Tamsese Efi ile uiga moni o lenei tusi ma lona mafuaaga na tusia ai.

Sa faapea foi ona momoli lona agaga faafetai tele ia Dr Patricia ile tusia ma le tuufaatasia o lenei tusi. Ae ole faafetai ale tamaitai tusitala na tusia le tusi ia Dr Patricia O’Brien na ia faafetaia ai foi le afioga ile Tui Atua ile avanoa ua tatala atu ai le faitotoa nate sailia ai faamaumauga e uiga ile Mau ma tusia ai loa le tusi e pei ona iai lenei faamoemoe.

Na ia faailoa foi nisi o vaega oloo tusia i totonu ole tusi faapea ma lona tāua i tagata Samoa. Sa faapea foi ona saunoa le tamaitia ia Hellen Clark ile saunoaga autu ole po, auā o ia tonu lea sa malaga atu i Samoa ile tausaga e 2002 a’o avea ai ma Palemia o Niu Sila, e fai ma sui ole malo o Niu Sila e fai le faatoesega ia Samoa e uiga i pulega saua ma le lē amiotonu ale malo faakolone a Niu Sila sa iai i la vaitaimi.

Ole afioga ia Laauli Michael Jones ole tasi lea saunoaga autu ole po lea foi sa momoli lona agaga faafetai ile afioga ile Tui Atua e tusa ai ma lenei faatofalaiga ua mafai ona ausia ile faamaumauina lea o tala ile Mau. Ua le gata ile aogā mo fanau oloo tutupu a’e a’o lea foi oloo fesoasosani mo tagata matutua.

Ole faapaiaina ole tusi na tatalo faapitoa iai le afioga ia Patele Iosefo Timu, faatasi ai ma le afioga ia Tuala Tusani Tagaloa ole sui lea ole aiga o Taisi faapea le tamatai na tusia le tusi ia Dr Patricia O’ Brien. O faafiafiaga ole po na faafiafia ai le autalavou Katoliko mai Grey Lynn lea sa latou usuina ai le pese e uiga ile Mau, faapea ma le ausiva ale Te Ura Tapu.

Ole tofa ia Tauanuu Perenise Tapu sa fai ma fofoga ole po, ae ole tama matuā ia Leilua Kolose sa fai ma sui ole atunuu ma le mamalu ole auvalaaulia e momoli se leo o Samoa e ala ile faafetai ile afioga ile Tui Atua Tupua Tamasese Efi ile taumafaiga o lenei faamoemoe o lea ua patipatia e Samoa i lea po. Ole faamanuiaga foi lea ale malo o Samoa ile Tui Atua lea sa fofogaina ele tamā matua ia Leilua Kolose.

Ile matagofie ma le mamalu ole tatalaina ole tusi ale Tui Atua ona ole toatele o i latou sa auai o tina ma tamā ua sinasina o latou ao auā o i latou ia oloo latalata mai lo latou iloa ole tala ile Mau. Sa faigofie foi ma leai se vevesi o lea po ona ole fesoasoani ale vasega ale aganuu Samoa 101 lea sa galulue e faasinosino nofoa mo nai tagata eseese sa auai.

O lenei faamoemoe sa tuufaatasia lea ele Gaualofa Foundation ae sa lagolagoina ele kamupani ale G-Mana Wholesale Autos le afioga ia Galumalemana Tai Galumalemana faapea le kamupani ale SSABS.

Sa faatauina ai le tusi i lea po ile $70 ile tusi ma saini ai le afioga ile Tui Atua faapea le tamaitai na ia tusia le tusi.

Filifilia Tamsese, Tupua Tamasese Efi, Halen Clark, Dr Patricia O’ Brien, Sir Laauli Michael Jones
Filifilia Tamsese, Tupua Tamasese Efi, Halen Clark, Dr Patricia O’ Brien, Sir Laauli Michael Jones