Mental Health Nurse Specialist (Filomena Le’aupepe)

Mental Health Nurse Specialist (Filomena Le’aupepe)

E tofu lava le tagata ma lona faiva na tuuina iai e le Atua, o meaalofa ma taleni, e lē fesiligia o faamanuiaga uma ia vaega. A iai le loto, e iai foi le auala e faia ai, ma maualafia ai ona e fesoasoani ai.

Na maua se taimi e faatalanoa ai se tasi o tamaitai Samoa, o Filomena Le’aupepe (Fasitoo Uta, Sili ma Satupaitea) oloo galue nei ile Forensic Mental Health i Brisbane, o ia ole Mental Health Nurse Specialist (Tamaitai Fomai Faapitoa mo le Gasegase ole Mafaufau) ua avea o ia ose laveai ile tele o tagata aemaise lava le fia faasoa atu o lana matafaioi, e fesoasoani ai i nai o tatou tagata Samoa oloo iai le manaomia ae faapito’augafa i nai tupulaga talavou ua fano soifua ona ua siliga tali’eseu ona maua ni fofo.

O iina tonu lava e fia faaoo atu ai se tautua aua atonu e avea lenei tusitusiga e faitau ai se tasi, fai lea ma avefeau e vave momoli atu ai se vaifaaola ise agaga, auā o aso e taugalemu ai, o aso foi e lē taugalemu ai, ae ole tagata ma lona tofi e fefaasoaa’i. Ole tala moni e iai lava le loto naunau ma le alofa moni ole Samoa lava ia ile Samoa.

O lenei matafaioi, latou te galulue ma tamaiti talavou ua solitulafono, ma ua masalomia,  oloo maua foi ise gasegase ole mafaufau. “E tele ni cases faapea i tulaga o nisi e faia ni solitulafono ae faato’a maua mai sona gasegase ona tuuina mai lea ile matagaluega lenei e faia suesuega faapitoa, pe faamaonia pe leai ina ia talafeagai ma se faasalaga, lea e tele ina tālia ai faaiuga ale faamasinoga se’i faia suesuega faapitoa e lenei matagaluega. O itu nei e lē faigofie, e lē puupuu foi le taimi ma pa’ole sailiga ma taumafaiga o nei auala, ae faafetai ile Atua ile tomai ua maua ua faigofie ai le galuega”, ole saunoaga lea a Filomena.

Na soifua mai i ona mātua sa iloga foi tautua i Samoa, si ona tina ose tamaitai fomai pasi (Fiu Posia Fetina’i Le’aupepe) ile tele o tausaga i Leulumoega, Afega, Tuasivi ma Motootua, faapea si ona tamā o Le’aupepe Pita sa avea ose faipule ile itumalo o Aana Alofi Numera 1.

O Filomena na amata mai ana a’oga mai St Marys Savalalo, ma malaga ane ai e saili manuia i Niu Sila ma nai ona mātua, si ona uso ma ona tuagane e toalua. Na a’oa’oina i St Annes i Newtown Ueligitone ma St Marys College i Ueligitone.  Na faamanuiaina i lona faaailoga ole Bachelor of Nursing mai ile Whitireia Polytechnic i Porirua ile tausaga e 2000, na maua lona faaailoga ole Post Graduate Diploma ile Mental Health Nursing mai ile Iunivesite o Ueligitone (Victoria). Oloo tau faamae’a ana pepa ole Masters of Philosophy i Notre Dame University Ausetalia.

Sa galue o ia mo le Health Pasefika Mental Health Services i Porirua mo Tagata Pasefika ua maua ile gasegase ole mafaufau. E faapitoa lana galuega mo tupulaga laiti, talavou ma o latou aiga, e iai lona naunautaiga o lona alofa e fesoasoani ai ia i latou. A’o ia galue i Ueligitone, na tele sona tomai na maua mai ai e ala i lona fesoasoani malosi e saili fofo o faafitauli e laveai ai nai alo ma fanau mai nei gasegase, ma o iina na faa’auupega ai o ia mo le isi laasaga o lona silafia, lea na apalai ile faigata tele o nuu i tua ose vaega o Ausetalia na ia mua’i to’ai taunuu mai iai.

Ina ua tuua Niu Sila, na ia galue mo le 5 tausaga i nuu i tua o Ausetalia e feagai ma tagata Apololiki, o iina na matuai tofotofoina ai le faatuatua auā e lē gata o amio a tagata, ae ole lamatia ai foi ole soifua auā e pei ona faamatala atu, ose galuega faigata ise tagata e lē o iai lona loto ma tuuina atu atoatoa. A iai le loto, e iai foi le auala e faia ai.

E faigata tele lenei galuega, auā e faatalanoaina ni mataupu matuā matuia ua aafia ai olaga o tagata. E faafetai Filomena ile alofa ole Alii i lona malosi ma le manuia, aemaise a’oa’oga mai ona mātua ua mafai ai ona ia uumau pea le gagana Faa Samoa aemaise foi le olaga Faa-Samoa sa ola mai i Fasitoo Uta ma Niu Sila.

Na maua se avanoa faaauro na ia faia ai ni a’oa’oga e uiga ile Gasegase ole Mafaufau ma ni suesuega, mo le Samoa Victim Support Group ma le Goshen Trust, na lagolagoina e le Skyeye Ltd, ia Ianuari 2018. A’o malaga atu i Samoa ile amataga ole tausaga nei, na valaaulia o ia e faasoa atu lana fesoasoani mo tagata Samoa, auā sa masani ona fai ana a’oa’oga ile leitio Samoa ma Toelau i Ueligitone i Niu Sila.

Na ia mafaufau i nisi auala e faalautele ai lana fesootaiga ma tagata, o lea na ia tatala ai lana upega o fesootaiga (website ole Dare2Dream Consultancy) e maua ai se fesoasoani mo Tagata Samoa ile faiga o tusitusiga e uiga i gasegase ole mafaufau. O lea ua maua ai se tusitusiga e uiga ile Depression e pei ona lausilafia e le toatele e faigata tele ona foia se’i vaganā ua maua le vaifofo.

Ua savalia nei le 20 tausaga talu ona galue Filomena ile matafaioi lenei ole Nursing/Mental Health Nursing, ma o nei tausaga e tele ua ‘oa ma tamaoaiga ai ile tele o faamanuiaga i lenei lava galuega. Ile taimi nei oloo taumafai lana research e uiga i lana polokalame ole Dare2Dream Mentoring Program.

O lana vaai, e faigata i Tagata Samoa lenei mataupu ole gasegase ole mafaufau ma ona togafitiga, auā e lē ose tomai Faa-Samoa le malamalamaaga oloo iai ile faafomai. Ole auala lea ua ia faalautele ai lona malamalamala ma tatala lona taofi e ala ile Dare2Dream Consultancy ile www.dare2dreamc.com e maua ai le fesoasoani mo Tagata Samoa ma soo se isi lava oloo manaomia se fesoasoani.

O isi faataitaiga tāua tele ia Filomena mai ona tuaa, ole agaalofa i soo se tagata. Ole mea tāua lava lea i lenei galuega, auā e faigata tele le galue ma tagata ua aafia i gasegase ole mafaufau. Ole tatalo lava ile Alii e maua ai le faamalosiau i taimi ua faigata ai le olaga, ia maua ai se vai malu mo tagata ua maua i nei puapuagatia.

Ole telefoni 0437724132 e maua iai Filomena pe asiasi ile Dare2Dream Consultancy ile itulau ole facebook. E mafai foi ona sue se fesoasoani mai le fomai masani ale aiga (GP). A faapea ua tau faaletonu le olaga ose isi ile gasegase ole mafaufau ia faafesootai se falemai ole mafaufau o lata ane, pe vili le tamaitai o Filomena, e fiafia e talanoa mai ia te oe.

Comments

comments