E ui lava ile tau ma’ati’ati mai ole malulu, peitai sa lei avea lea ma ala na taofia ai le fetuleni atu ole mafutaga ale Tasi ia Keriso e pei ona atofaina lo latou aso taalo ile Aso Toonai 10 o Iuni.
Sa faataunuuina lea faamoemoe o Taaloga Tuufaatasi a Autalavou ma fanau laiti ale Mafutaga a Ekalesia i Kuiniselani ole “TASI IA KERISO”, na faia lea i Harris Fields State School Oval.
Sa saunoa le Susuga ia Councilor Steve Swenson ole sui ole Logan City Council Division 3 ile saunoaga autu e tatala aloaiaina ai taaloga i lea taeao.
Ose ripoti na tuuina mai ile Peresetene ole Tasi ia Keriso, susuga ia Ps Anthony Mauinatu, na maeu le alofa ole Atua i Lona Aao faamalumalu, na mataina ai le aso aua na amataina taaaloga ile faafetai siitia ona faagasolo lea o savali faaaloalo a ‘au uma e tolu ua vaevaeina iai ekalesia.
Ole North Side poo ekalesia mai le itu Matu, ole Central poo Ekalesia oloo ile ogatotonu e aofia ai Ipswich ma Southside o ekalesia o loo ile itu i Saute o Brisbane ona sosoo ai lea ma Taaloga Afeleti, Volipolo, Lakapi Pai, Soka ma Taaloga malie e pei o Tosogãmaea ma isi lava mau taaloga na fiafia ai alo ma fanau faapea tagata matutua.
O aso faapenei e seasea maua e mafuta ai ma talatalanoa aua e toso ale pito laau ale tagata ia ile itu e aga iai ae avea nei aso faapea e mafuta ai ma eva e ese mai sauniga ma tapuaiga ile Aso Sa.
Sa faaautuina taaloga ile Autu “O le Malaga” poo le “Journey” ona ole fia faamalosiau i Talavou ole olaga faatalavou mo le Alii ose faigamalaga. Ole itu lelei e leai se vevesi pe ita sesi pe a lē taalo, aua sa faia lava taaloga ale fanau laiti 4-10 tausaga, Juniors (Autalavou aoga) ma le Seniors (Autalavou matutua).
O se avanoa faa’auro foi na maua e nisi o alo o Samoa o loo auai i nisi o ekalesia o lenei mafutaga e pei ole alii sa taalo ile Lakapi Liki o David Solomona ma le Tamaitai o Abigail Meafou ole Au Netipolo ale Firebirds a Kuiniselanin, sa saunoa ai ma faamalosi’au foi i Talavou ile tulaga ua ausia e i laua i mea tulaga tau taaloga aemaise ole olaga faatalavou ma ona luitau e ao ona tapenapena ma mataala iai pe a fesouaina i peau fafati ole olaga, aemaise laasaga lelei ao savalia le malaga ile faatuatua ma le ola mo Iesu.
Sa tautino i laua e le faigofie le ola mo le Alii ao avea ai ma tagata taalo i taaloga. E tele faaosoosoga ma luitau ae taua lou auai i se ekalesia ma e galue ai e maua ai lou sootaga ma le malosiaga ete manumalo ai i soo se faafitauli e faafesagai ma oe aemaise ole faamoemoe ile Alii.
Ole naunautaiga lava lea na naunau ia ile Komiti ma Faifeau uma na tuufaatasia lenei faamoemoe, ia maua nei avanoa e mafuta ai ma fealofani talavou ole Tasi ia Keriso ma fefaamasaniai le isi ile isi.
Na tapuni aloaia taaloga I lea afiafi ile ta ole fa (4pm) ona sauni lea faatoa lauina togi ma nisi vaega ina ua faamae‘aina le mafutaga a Tupulaga talavou ile latou Sauniga tuufaatasi a Autalavou uma lea na faia ile afiafi ole Aso Sa 11 Iuni ile hall ale ekalesia ale Hosanna i Logan City.
Ole faaiuga o taaloga na lauina e le komiti e tutusa uma au taaalo ma na maufaaailoga ma tofusia uma ‘au na tapena e le komiti ona ole autu lava ia faamasani ma fealofani Talavou. Ole sauniga tuufaatasi e silia ma le 450 tagata sa auai e aofia ai Talavou, matua ma tamaiti.
E silia ma le 17 ekalesia sa auai i lenei faatasiga ma latou Autalavou ma e ose sauniga toatele lea talu ona Amata ina lenei mafutaga. E toatolu taitai tamaitai mai nisi o Autalavou sa fai ma sui o Autalavou mai itu e tolu, North, South ma le Central sa faamalosiau ile Upu ale Atua ma tautino ile lelei ole Atua.
O aitema ole po sa saunia e le North le latou pese , ole Hosanna Brisbane sa fai ma sui ole Central ile latou pese ma South ole VOC, faapea le Youth ma le Harvest Worship Centre Logan o Siva faaleagaga.
O Ps Sam Lavatai na MC ile polokalame ae ole Susuga Ps Robert Lotomau sa failaugaina le Upu ale Atua ma momoli le feau i Talavou ile latou faigamalaga oni Talavou e pei ona autu iai, “The Journey”. E toatele talavou sa tutulai ile valaau ma naunau e ofoina soifua mo le Alii e tusa ma le feau ole mafutaga.
Na momoli le agaga faafetai tele ole Peresetene ole Mafutaga a Ekalesia Tasi ia Keriso, Pastor Anthony Mauinatu e tusa ai ma le tali sapaia ma le galulue faatasi o ekalesia aemaise o autalavou, alo ma fanau sa auai faapea le paia ile vasega o faafeagaiga ma faletua, matua ma tagata lautele sa auai atu.
