E lē ose mea fou le tatala atu o atopa‘u o faila, mo mataupu tau faamasinoga i Samoa ale tamaitai loia, Olinda Woodroffe ae la‘u ane ai ma seevae tamaiti, o mea taalo, lavalava tamaiti, api ma tusi a‘oga.
“Oute faaaogā lava avanoa nei oute sau ai i Samoa i faamasinoga e la‘ula‘u mai ai nai lavalava ma seevae mo nai tamaiti oloo manaomia. E oo lava i papalagi oute masani ai, e malaga mai i Apia, e tate faaoioi atu lava iai se taga lavalava e faatumu atu ai a latou ato i Samoa”
O foai nei, e maua mai se faamanatu faifaipea lava a Annette, (le alo o Olinda e loia foi) i aiga ole latou vaiaai i Remuera, e aua ne‘i tia‘iina latou lavalava tamaiti, ae avane ma ia. Ona faaputuputu ai lava lea o na foai mai aiga mauoloa o Remuera e faaofiofi i ato faila a Olinda e pei ona molimauina foi ile vaiaso talu ai.
Saunoa le tamaitai loia, “oute alofa tele i tamaiti, e iai foi la‘u fanau, peitai ua manuia lava latou i Niu Sila ae momomo lava le loto pe a vaai atu male alofa, ona oloo maua lava i Samoa tamaiti o feoai telenonoa (tulou).
Pei ona molimauina ele tusitala, ole aga masani lava lea a Olinda pe a uma ane se faamasinoga tusa poo le ā le pisi, ae i sona taimi laitiiti lava o tau faasoasoa mo tagata o manaomia lana tautua, ae tau faavāvā atu ai lava male faiga o tagapepa lavalava e tufatufa.
E lē gata o nai fanau i Upolu, ae ua oo lava i Savaii le molimoliga faamomoli ale tamaitai loia. Na pei e malo ile lotto foliga ‘oli‘oli male faafetai o fanau a aiga na oo atu iai le faasologa ole tufatufaga o lona ma ‘au i lenei masina.
Pei ona faafetaia ai ele tina ia Ruta Tanielu taga o lavalava ua avatu mo lana fanau. E lē masani ai ona avatu ni mea faapea mo lana fanau, ae faafetai tele ile alofa o lea foi Samaria agalelei. E faapea lava Ruta, “ai o tagata faapea e pei o Olinda e matamumuli e omai ma ni mea faapea mo matou, ae leai la e iloa foi ele loia alofa i tagata e lē aloaia e pei o matou, faafetai tele lava le agalelei.”
Ole faamoemoe ole tamaitai loia ina ia faaauau ai pea lea foi auala e fesoasoani atu ai mo tatou tagata i Samoa e latou te manaomia. E tai faalua ile vaiaso ona malaga mai Leuluaialii i Samoa.
O isi taimi e faalua, tolu ile masina, poo le atoa lava ole lua masina faatoa malaga mai. Peitai o na taimi uma e monoti mai ai lava ma lavalava, ae o afifi mo tamaiti i Samoa.
Ua maitauina foi, o taimi e taunuu ai i lona maota i Vailima, a taunuu asiga, e tufa tufa uma lava se manufata poo se size two i aiga tuaoi ma ona aiga ae o tagata asiasi atu, e leai sana fasipuaa e tausami. O nisi nei o itu o Olinda e lē o mafai ona iloa atu ele toatele, vaganā ai lava ona aiga ma ana uo e latalata iai, ua masani i lona alofa faasafua.
Ua oo lava i mataupu tau faamasinoga e fitoi tonu i tagata lima vaivai, aemaise o mataupu ua aafia ai aiātatau ma soifua o tamaiti ma tina, ua ia ofo iai le tautua a lona ofisa loia ini aiaiga faapitoa.
Ose taimi ole masina nei, e toe malaga ai foi le tamaitai loia i Apia mole si ana mataupu tau faamasinoga, e mautinoa lava foi, le taufaaofiofi iai o ni faamomoli mo nisi tamaiti ua i lana lisi.
